Eja formale a Sa Die cun milli dificultades, nono a temas chi non b’intrant nudda cun sa festa natzionale de sos sardos. Sa resposta de sa Giunta Regionale a sa denùntzia de Pasca Manna de su CSU est istada lestra e forte. Una delìbera chi fiat giai ismentigada e posta a banda (e non fiat mancu a s’ordine del giorno de sa Giunta) est istada iscarràrgiada e aproada in presse in presse. Tando Sa Die si faghet pro sa Giunta Regionale, finas si abbarrat carchi dificoltade protzedurale ca sos tempos tècnicos pro un’organizatzione normale non bi sunt prus.
Dificultade chi si podet notare finas dae sas datas de sos comunicados. In unu primu “lànciu” Ansa si faeddaiat de tzelebratziones dae su 14 a su 28 de abrile. In sa nota chi est essida in su giassu ufitziale de sa Regione sa die in fatu si faeddaiat, cun prus prudèntzia, de festegiamentos dae su 24 a su 28. Sa beridade est chi sa delìbera de aprou est clicàbile petzi dae eris ca est aberta in totu galu sa protzedura de variatzione de bilantzu de sos 160 mìgia èuros dae su turismu a sa cultura. E no est una cosa chi si podet nàrrere a mangianu e fàghere a su sero. Est òviu chi sos ufìtzios, sena sa seguresa de sa cobertura finantziària, non podent comintzare sas protzeduras de afidamentu a chie at a tènnere s’incàrrigu de organizare.
B’at duncas galu problemas chi de seguru ant a pesare subra sa resèssida de sas manifestatziones chi ant a èssere, de seguru, prus “collaterales” ocannu, chi non printzipales. Semper chi si fatzant de aberu.
Un’annada mala a beru pro Sa Die de sa Sardigna 2015. In sa prima botza de proposta de bilantzu a su Cussìgiu, sa Giunta (finas s’assessora Firino tando) no aiat proposto mancu un’èuro pro la fàghere. Sunt istados sos soberanistas, mesches Il Partito dei Sardi, a cumbatare in Cussìgiu pro torrare a pònnere un’emendamentu de 200 mìgia èuros. Aproadu, pariat cosa fata. Ma, una bia chi s’allegadu tècnicu ets lòmpidu in Cussìgiu, su dinare non bi fiat. Faddina o sabotàgiu? Non s’est mai cumpresu. Fatu istat chi b’at chertu duos meses de chèscias, protestas e documentos polìticos in antis de lòmpere a como.
E comente aiat antetzipadu Limba Sarda 2.0 s’est verificadu su fatu chi a sa Die sunt istados postos temas chi non b’intrant nudda. Cosas chi in sos annos dae su 2008 a su 2014 non fiat acuntèssida. Un’operatzione seguramente mòvida dae chie in intro de sos ufìtzios no at mai bajuladu su significadu natzionalitàriu de sa Die e tando at semper chircadu de b’ammesturare àteros argumentos chi non bi intrant nudda. Una faina italianista de “amasedamentu” de sa festa.
Paret tando chi si siat abigiadu de custu su segretàriu de Il Partito dei Sardi, Franciscu Sedda, chi est unu chi at cumbatadu pro fàghere custas festa, cando at lèghidu in sa delìbera chi pro Sa Die sa Regione at a faeddare “nelle scuole una campagna di sensibilizzazione per far riscoprire agli studenti i valori dell’agricoltura e di una sana alimentazione, basati sul rispetto della natura e della genuinità della produzione”.
Segundu Sedda in tamen:
“Ma attenzione ad evitare ciò che è successo in anni passati quando a Sa Die sono stati associati eventi o personaggi estranei sia alla Sarda rivoluzione che ai valori di sovranità della Sardegna. E tantomeno si è stati capaci di guardarli sotto una luce nuova, realmente nazionale. Della nazione sarda, per la nazione sarda.
Sa Die non è una sagra né un evento di marketing. Il suo valore è quello di una festa nazionale che ricorda uno dei più importanti momenti rivoluzionari della storia della nazione sarda. Un momento in cui migliaia di sardi combatterono per una Sardegna più giusta e libera. Un momento in cui tanti sardi morirono o furono costretti all’esilio dalla repressione sabauda per aver inneggiato a una Sardegna sovrana, libera dall’oppressione feudale, fatta a Repubblica . Questo è il senso che dobbiamo onorare e celebrare il 28 di Aprile”.
Istamus a bìdere si in custas pagas dies sos ufìtzios resessent a fàghere una protzedura pro sa cale sos tempos tècnicos sunt in rughe.
Leave a comment