– de Salvatore Serra –
Polìtica linguìstica cheret nàrrere finas a fàghere giornales in sardu, pro afortire sa capatzidade de custa limba de operare cun unu registru artu.
Non podimus fàghere a mancu, duncas, de ammentare sa revista mensile de s’Unesco chi intre su sèculu coladu e su sèculu presente essiat in 28 limbas. A sa prima essiant, in cuntemporànea, sas editziones in inglesu, frantzesu e ispagnolu (The UNESCO Courier, Le Courrier de l’UNESCO, El Correo de la UNESCO; pustis, a distàntzia de unu mese, si publicaiant sas versiones in sas àteras 25 limbas. In mesu de custas bi fiat finas s’editzione in limba sarda (Su Curreu de s’UNESCO). Sos cuidadores fiant Diegu Corràine (chi fiat finas diretore), Lisandru Cossu e su chi iscriet custas notas. In cada nùmeru bi fiat su tema de su mese, cun unos cantos artìculos relatzionados, e àteros servìtzios de argumentu diferente.
In custu chi est su nùmeru 0 de sa versione in sardu, annu 2000, b’at, in mesu de s’àteru, un’interventu de s’archeòlogu famadu Giuanne Lilliu. Inoghe pòngio unos cantos passos de s’artìculu
________
Oe, su binti de làmpadas de su duamiza, est una die de amentare pro s’archeolozia sarda e italiana. Presentes sos rapresentantes de s’UNESCO e de àteras istitutziones culturales, sas autoridades, e, mescamente, s’onorèvole Giovanna Melandri, ministru de su guvernu italianu pro sos benes e sas atividades culturales, Su Nuraxi de Barùmini est reconnotu comente monumentu chi faghet parte de su patrimòniu culturale de s’umanidade.
Unu monumentu de balore mannu chi, cun sos àteros nuraghes connotos (prus de sete miza), est unu de sos fenòmenos prus istraordinàrios de su mundu mediterràneu antigu. Frutu de una fortza manna de sos Sardos chi tando fiant lìberos, in issu si bidet una tzivilidade architetònica e artìstica importante, una sotziedade aunida chi creiat in sos balores s’aretè e de s’apartenèntzia a un’àrea culturale diferente dae sa clàssica. Custa tzivilidade est su fundamentu de un’ideolozia autònoma, cumbinta chi su progressu podet benner petzi dae sas fortzas suas…
Leave a comment