Angius'house: su sardu de cada die divenit sèrie web

Angius'house: su sardu de cada die divenit sèrie web

Dae mancu un’annu est nàschida una sèrie in sa retza sotziale, totu in sardu, prena de sighidores e chi est divènnida in pagu tempus famada, mescamente in sa zona de Casteddu: so faeddende de Angius’house. Sos vìdeos minudos, contant sa bida de sa famìllia Angius de Uta, un’istòria fitiana chi arresonat a totus.

Dae ue est nàschida s’idea de fàghere Angius’house? Cale est istada sa raighina in sa realidade e cale fiat sa punna de s’inghitzu?

S’idea de una scenitedda est nàschida gasi, in manera spensada. Fiat su cabudanni de s’annu colau e mi fia pongende d’acordu cun un’amigu meu pro andare a sa festa de Santu Basìliu a Deximeputzu. In cussu momentu si nche est alluta una luxe e mi so immaginau de stòrchere una tzia chi si fiat acontzende sos pilos friscos de parruchieri pro andare a sa festa, e in su mentres un’amiga ddi faghiat is cumplimentos pro s’acontzadura e chi, deretu a pustis, dda pigaiat in giru. Dae inoxe sunt nàschidas Gisella e Marisa.

Penso chi pagos connoschent custu contu e creo di ddu mìntere in unu vìdeu pro s’anniversàriu de sa pàgina.

Unu piessignu ispantosu de Angius’house est chi Patty, Gisella e cada personàgiu tenet una boghe e una personalidade sua. Comente ses resèssidu a lu fàghere? T’at agiudadu su traballu chi faghes?

Traballende comente educadore so a fitianu in paris cun antzianos e pipios chi, sena ddu scire, mi dant ideas de cada casta, ma cussu chi fatzo in Angius’house est diferente. Deo boliat chi is personàgios esserent onniune cun sa cara sua e prus che totu cun una personalidade issoro. Sa manera de chistionare, de si mòere o carchi modu de nàrrere chi torrat sunt pensados totus comente si siant persones normales, comente unu sprixu de nois. A ddos interpretare pro me est una esperièntzia spantosa, ca potzo intrare in mundos totus diferentes. Forsis est dae cussu chi mi benit sa capatzidade de ddu fàghere.

Si serat chi in cada puntada bi est un’impinnu e unu contivìgiu mannu de s’iscritura. Comente traballas?

Cussu chi bido e bivo, ma finas sos contos de giaja mea sunt su fundamentu de is puntadas, dae ue scrio chistionos e scenas. Sa prima cosa chi naschet est sa stòria e a pustis sa scenegiadura. A fitianu prefero girare a mangianu ca so prus ispirau e sa luxe est prus bona. Mi pigat tempus meda ca giro bortas medas sa matessi botada fintzas a cando non so cumbintu a su totu, ma est giustu chi mi balanget totu s’afetu chi is sighidores nos ant dadu in cust’annu.

In sos cummentos a sas puntadas si leghet chi medas sighidores si reconnoschent in sas situatziones chi contas e si bidet finas chi bos cherent bene meda. Comente est crèschida sa pàgina? Ite t’at agiudadu?

Est capitadu totu in manera sentzilla. Chie mi sighit si reconnoschet in cussu chi conto ca sunt istòrias de vida fitiana. Onniune connoschet una bixina troddinca, comente Vitalia, chi si podet cunsiderare in su totu s’antagonista de Angius’house. Chie non connoschet una persone bufa e spassiosa comente Patty? E chie a bìndixi annos non at mai pediu s’istrina dae sa mama comente Michael, mancari totus is machines chi faghet?

Angius’house est retzitada in unu sardu campidanesu meda istrintu. Unu seberu atrividu, mescamente ca podet assustare chie non faeddant a fitianu su sardu. A parre tuo est unu seberu chi bos at agiudadu? Comente lu bides su sardu in sa zona tua? Est in salude?

Su sardu chi chistiono deo est cussu chi apo semper intesu a intro e a fora de domo. Non est istau unu sèberu. Isco chi non totus podiant cumprèndere o apretziare su chi faghia, ca a dies de oe mescamente is giòvanos connoschent pagu su sardu. Comente totus is linguas, su sardu puru est mudende. Mancari fintzas deo apo de imparare meda, chirco de ddu impreare in manera spontziada, contende chi su meu est istau un’imparu sena stùdiu. So bidende chi is giòvanos cun Angus’house sunt impreende unu sardu prus cuidau, e non sceti frasixeddas italianizadas. E gasi bellu tènnere una lingua nostra de amparare e pro custu est pretzisu a dda chistionare e a dda scrìere bene. Deo, pro esempru, cun sa grammàtica so unu dannu, ma bolu imparare!

Comente at a sighire Angius’house in su benidore? Podes iscobiare carchi cosa?

Is pùblicas relatziones sunt de importu mannu in su chi fatzo e difatis luego b’ant a èssere noas de spantu: unu cameo interessante meda e una collaboratzione chi sunt abetende in medas. Dae pagu sunt intradas in Angius’house duos personàgios noos e chi sunt pràxidos meda e chi pro custu ant a abarrare: Hadren, sa connada de Gisella; e Immacolata Toeschi, una bixina. In prus, pro more de carchi ammentu, chistiones abertas s’ant a acontzare.

Apo lèghidu chi Carla, pro unu pagu de tempus, non podet prus traballare a sa sèrie e apo lèghidu finas sighidores iscrètidos medas. Li cheres nàrrere carchi cosa?

Carla at seberadu de lassare su rolu suo pro chistiones de traballu e suas etotu chi, a dolu mannu, non dda faghiant, dae s’inghitzu, partetzipare comente boliat e depiat. Deo rispeto su seberu suo, comente est giustu chi siat. Calicunu chi sighit Angius’house at dimandau si calicun’àteru at a pigare su rolu suo. Est craru chi nono. Donatella at abarrare semper issa. Gianteris at lassadu un’ùrtimu saludu a chie nos sighit, chi ant torradu scedas prenas de afetu meda, fatende•ddi is mègius augùrios.

Gabriele Tanda

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *