– de Salvatore Serra –
Munitzipalidade de Pirri, Cummissione Ambiente – Servìtzios Tecnològicos – Viabilidade – Tràficu e Trasportos. Argumentu de sa reunione: s’aprovatzione de unu documentu subra de sos cartellos istradales noos. In ue est sa noa? In sa proposta de Enrica Fois, cussigera de Liberu. Issa at bogadu a campu un’emendamentu a su documentu, pedende chi totu sos cartellos siant in sardu e in italianu, cunforma a su chi narat su regulamentu de sa Comuna de Casteddu. Resurtadu? S’emendamentu est coladu a s’unanimidade.
Sa cussigera at torradu gràtzias a sos collegas pro s’amparu chi ant dadu a sa proposta e pro sa sensibilidade issoro. Un’amparu e una sensibilidade chi non sunt iscontados: a dolu mannu nostru, b’at amministratziones in ue narant chi non si podet gastare dinare in “cosas chi si nde podet fàghere a mancu”. E in sas “cosas chi si nde podet fàghere a mancu” intrant semper sas mesuras in favore de sa limba sarda.
Ma Enrica Fois non tenet dudas. “Finas a cando apo a tènnere custu incàrrigu – narat – no apo a torrare in palas in cada chistione chi cumportet unu passu cara a s’autodeterminatzione”.
Duncas, seis abèrtidos: a amministrare bene non cheret nàrrere petzi a s’interessare de traballu, servìtzios e urbanìstica, ma finas a pònnere in contu sa limba e sa cultura de su pòpulu sardu.
Leave a comment
Bèni meda, Enrica Fois!
E bonu ca is àterus dhi ant donau arrexoni.
Ma meda de prus s’iat a podi fai in cussu e in àteru po èssi genti in e de su logu (in su mundhu!) cun dignidadi de genti, si pentzaus chi totu su chi dipendit de nosu no depeus aspetai chi si dhu fatzant is chi no ndi dhus importat nudha ca tenint de pentzai a is cosas insoru.