Domìniga deghe de cabudanni in sa pratzita comunale de Largu Gramsci, in tretos de Sa Pramma in su coro de sa bidda de Bànari, s’Ufìtziu limba sarda de su Meilogu, su Comune e sa Pro loco de sa bidda ant ammanigiadu unu sero pro ammentare a su poeta Barore Sassu e fintzas pro dare ondras a su poeta vivente Àngelu Porcheddu.
Dae sas 6 de sero est in programma un’esecutzione resada e musicada cun s’operadore linguìsticu Mauro Piredda e sos musitzistas Luciano Sezzi a su sassòfonu e Andrea Fenu a su pianu. Sos tres, in sos ùrtimos annos, ant propostu unos cantos ispetàculos in sardu movende dae sa figura de Bertolt Brecht e dae carchi romanzu sardu e de fora.
Sa resone la decrarat a craru su sìndigu, Francesco Basciu: «s’eventu punnat a printzipiare caminos e sensibilidades culturales pròpiu movende dae chie at lassadu un’istiga orale e iscrita in bidda e in totu sa Sardigna pro mèdiu de s’impreu creativu de sa limba sarda. Chie si siat pensat a Bànari che a “sa ‘idda de tiu Barore”. E chie si siat, in su mundu de sa poesia a taulinu, bidet in Porcheddu capatzidades mannas de pintare iscenas de messàgios umanos cun isfumaduras diferentes de colores, dae sas dudas de su tempus a sas isperas de sas persones e de sas comunidades».
Difatis sos duos poetas sunt de importu mannu. Sassu, 54 annos cantende in palcu, lu connoschent in totu sa Sardigna pro sas garas suas in pare cun àteros improvisadores de gabbale (Remundu Piras e Pepe Sozu subra de totus) e pro una capatzidade arta de agatare cuntzetos cumpridos. Porcheddu, cun prèmios e reconnoschimentos in sos cuncursos prus de importu de s’ìsula est unu intre sos prus mannos cumponidores de meledu in pare cun Giuanne Fiore, Jubanne Piga e àteros maistros de sa literadura in versos.
Gabriele Tanda
Leave a comment