Alphafold 3 pro bogare a campu meighinas noas

 

Si narat Alphafold 3, e est una aina de intelligèntzia artifitziale. L’at bogada a lughe su neurosientziadu britànnicu Demis Hassabis, fundadore de sa sotziedade DeepMind. Pro sa prima bia una IA podet istudiare s’interatzione de sas  proteínas cun su  restu de sas moléculas essentziales pro sa  vida: ADN e ARN, molèculas minores —medicamentos— e anticorpos, sas proteinas minoreddas de su sistema immunitàriu ispetzializadas in sa gherra  contra a virus, batèrios e  finas  tumores.

“Sa biologia est unu sistema dinàmicu e sas propiedades suas  benint pròpiu dae interatziones intre sas molèculas chi formant sa tzèllula. Alphafold 3 est su primu passu pro las cumprèndere”, narat Hassabis.

Sos particulares  de custu sistema nou de IA los ant publicados in Nature, revista referente de sa mègius  sièntzia mundiale. In prus  Google at a abèrrere unu servidore gratùitu a manera chi sos sientziados podant impitare custa aina.

Su profetu prus làdinu  de custu  sistema est chi dat sa possibilidade  de bogare a campu  meighinas noas. Unu traballu chi at a fàghere, custa bia in àmbitu privadu, Isomorphic Labs, una filiale de Alphabet (mere  de Google) ghiada dae  Hassabis. Cun s’agiudu de Alphafold 3 e isvilupos  additzionales pròpios, su sàbiu  de Google isperat de minimare  de su mesu su tempus chi si ponet a iscobèrrere una meighina in antis de cumintzare sas proas cun sos malàidos, dae sos chimbe annos de como a duos annos ebbia, comente at craridu  a Financial Times.

Sa sotziedade at giai firmadu  duos cuntratos de collaboratzione cun sas  multinatzionales farmatzèuticas Lilly e Novartis, chi ant postu deretu deghinas  de milliones de dòllaros e ant promissu de pònnere mìgias de milliones  de dòllaros cando b’at a àere resurtados.

 sa redatzione

Leave a comment