Noas in sas indàgines pro s’omitzìdiu de Massimo Deidda, s’allevadore de 63 annos de Gergei, mortu eris sero in sa sienda sua in localidade Aureddus. Sos carabineris de sa Cumpannia de Ìsili e de su Nùcleu Investigativu de su Cumandu provintziale de Nùgoro ant firmadu a duos allevadores, babbu e fìgiu, cunsiderados sos mortores.
Diat pàrrere chi Deidda e sos duos allevadores apant brigadu pro chistiones de pasculu e chi a Deidda l’apant corfidu a conca cun unu trastu pesante, fortzis unu fuste.
A dare s’allarme sunt istados sos familiares de s’allevadore chi, cando non l’ant bidu recuende, si sunt apistighingiados. Sos Carabineris, arribados a su logu, l’ant agatadu imboladu in terra. Sos sanitàrios de su 118 ant pòtzidu petzi tzertificare sa morte sua. A pustis sunt supridos su magistradu de sa Procura de sa Repùblica de Casteddu, chi est coordinende sas indàgines, e su dutore legale.
Sos Carabineris ant chircadu de cumprèndere ite at fatu Deidda in sas ùrtimas oras de sa bida sua e a pustis ant cramadu a caserma, pro los porrogare, a sos duos allevadores, arrestende·los. A cantu paret non fiat mancu sa prima borta chi sos òmines si brigaiant pro chistiones ligadas a sos terrinos. Iscunnortu mannu in sa bidda de Gergei, su sìndigu Rossano Zedda at detzisu su corrutu tzitadinu pro sa die de s’interrru.
Mariantonietta Piga