Chi emmo. Chi nono. Sa polèmica contra a su green pass si nch’est mandighende cale si siat àtera chistione e totu cantu a issa est subordinadu. Esempru? Sa chistione operaja, cosa chi inoghe non si podet mentovare sena faeddare «del piano di rinascita», cosa chi, a dae chi a custa ala de su mare nch’istamus, chie lampu si nd’afutit de sa gherra de sos italianos de sa Gkn? Però si sos portuales triestinos narant su «chi nono» tando sos traballadores «sunt alleados nostros»! S’allega est oramai influentzada. Ma s’influèntzia chi s’annu coladu est colada a sa muda sena corfu fèrrere, ocannu comente at a èssere? Sos espertos narant chi intre sos virus b’at cumpetitzione e chi duncas a su virus istajonale de s’annu coladu su corona nche l’at postu a banda. Ma, de prus, b’at de nàrrere chi s’annu coladu b’aiat prus limitatziones (distantziamentu, dispositivos de protetzione, serradas) e chi duncas su virus non fiat a runda finamentas pro cussu. Como chi sas limitatziones sunt menguende, cun su fritu chi est tzochende·nos sa ghenna, cun nois etotu chi nos nch’amus a istare de prus in logos serrados in domo, ispassiende·nos, traballende, istudiende e gasi sighende, est sugetu chi su virus de s’influèntzia torret a cùrrere. Coesistèntzia, duncas. Cun carchi problema. Si s’annu coladu belle nemos s’at pigadu s’istajonale, chie sunt sos chi ant isvilupadu s’immunidade (mancari siat partziale che su de s’influèntzia mudat, de virus)? E coinfetziones b’amus a àere? E cada istùrridu ite nos at a pàrrere? Corona o nono? E cun custa duda sa gente a s’at a sighire a tamponare? In s’ìnteri cheret chi pensemus a sos pabassinos, posca amus a bìdere.
Màuru Piredda
Leave a comment