Agiudos de Istadu a s’imbesse

Agiudos de Istadu a s’imbesse

“S’Europa, si podet nàrrere, ponet in campu agiudos de Istadu a s’imbesse, amparat  s’indùstria turìstica de su Continente e nche ponet sa Sardigna a bandas dae su sistema  turìsticu  italianu ed europeu”.

At faeddadu a tostu Antoni Moro, assessore regionale de sos Trasportos, custu mangianu,  in sa sede de sa Confcomercio de Tàtari,  intervenende a pitzu de su bandu europeu pro sa continuidade territoriale.

Ma, cale est s’arcanu?  Sa chistione est chi sa UE non ponet làcanas a sas tarifas pro sos non residentes:  duncas sas cumpannias faghent sos prejos chi cherent,   ponende impèigos mannos a sa mobilidade.

Su  dannu pro sa Sardigna, at craridu Moro, tenet duas caras: a un’ala si ponet in arriscu su deretu a sa continuidade,  a s’àtera   si creant problemas  a sa trama produtiva e retzetiva de s’ìsula nostra,  ponende tarifas  foras d mercadu  chi reduint  cumpetitividade, opportunidades e isvilupu”
No est de badas, tando, chi nemos at leadu parte in sa gara pro s’aeroportu de S’Alighera:  sas cumpannias ant chertu  abbandonare sos collegamentos cun una pertzentuale prus arta  de viagiadores sardos in continuidade, pro s’assegurare, renuntziende in totu o in parte  a sa cumpensatzione econòmica, sas tratas in ue b’at prus tràficu turìsticu.

Como, at naradu s’assessore,  no istentant a publicare unu bandu nou cun sa  protzedura lestra aviada de acordu cun Enac e su ministèriu de sos Trasportos. Cun s’isperu chi sa cosa megioret.

(sa redatzione)

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *