Sa crisi de su Covid est ponende in dificultade manna categorias medas, ma una casta de traballadores a s’ispissu ismentigada dae sos polìticos sunt sos artistas. Issos sunt dae gasi un’annu chi non faghent cuntzertos, nen ispetàculos. Sos “ristoros” lompent pagu e male e su perìgulu mannu est chi, chie faghet manna sa cultura e sa limba de sa Sardigna potzat lassare istare sa mùsica impoverende a totus sos sardos.
Pro proare a si rempellare a sa crisi, sa cantadora Claudia Aru at propònnidu de acollire in sas pàginas de chie tenet in coro sa mùsica sarda unu vìdeu leadu dae su canale ufitziale de youtube de un’artista sardu. S’initziativa servet pro donare visibilidade a sos musitzistas gasi da los fàghere connòschere, ma finamentas ca abbaidende sos videos si podet fàghere intrare carchi soddu a sos artistas pro more de youtube.
Non nos depimus ismentigare chi sos artistas sunt semper istados disponìbiles in cada emergèntzia, pro regòllere fundos e pro fàghere benefitzèntzia. Nois de Limba sarda 2.0 amus faeddadu cun artistas medas e ischimus cantu amore bi ponent e cantu istùdiu. Como sunt issos a tènnere bisòngiu de agiudu, mancari chi non at a isòrvere su problema, a su nessi lis podimus fagher bìdere, cun pagu, chi li semus a curtzu.
(redatzione)
Leave a comment