Est mortu in Tàtari, a s’edade de 70 annos, Micheli Pinna. Fiat su diretore iscientìficu e si podet nàrrere s’ànima de su Istituto di Studi e Ricerche Camillo Bellieni.
S’istitutu, fundadu in sa capitale de su Cabu de Susu in su 1989, si òcupat massimamente de chistiones ligadas a sa limba sarda, cun atividades de isportellos linguìsticos e cursos de sardu e de formatzione.
Pinna aiat traballadu pro annos comente professore de filosofia in sos litzeos turritanos. Paris cun su sardu aiat semper curadu finas s’atividade filosòfica.
A custu cheret agiunta s’atividade polìtica: fiat istadu cussigeri comunale e presidente de sa cummissione Cultura, semper in Tàtari, pro su Partidu Sardu, dae su 2005 a su 2010.
At lassadu libros in prosa e de poesia.
Pinna, chi fiat malàidu dae ora de coro, est mortu su sero de su 5 de santandria. Oe 7 de santandria dd’ant fatu su funerale in Bono, sa bidda in ue fiat nàschidu.
(gianni muroni)
Leave a comment
A lu connòschere in sa santa glória, a Micheli! L’ammentamus cun piaghere e cun profetu.