Sa figura de Adelàsia de Turres, ùrtima reina de custu Regnu giudicale, est una de sas prus connotas de s’istòria sarda e istimadas a livellu populare.
Reina de Gaddura, comente mugere de Ubaldu Visconti, est istada a coa soberana turritana a sa morte de su frade Barisone e de su maridu. Su cojuiu malassortadu cun Enzo de Hoenstaufen, fìgiu illegìtimu de s’imperadore Federicu II, finidu cun s’abbandonu dae parte de su pobiddu, at marcadu s’esistèntzia sua.
Sos istòricos non sunt seguros nen de su logu in ue dd’aiant interrada nen de s’annu chi est morta. Totu custos datos faghent in modu chi dae s’istòria si passet a sa paristòria, dende a s’ùrtima soberana de Turres un’àura agiumai mìtica.
Custa reina trista est istada eternizada finas in poesia. A Adelasia difatis, pròpiu pro sa coja cun Enzo, est dedicada una poesia, forsis cummissionada dae su maridu, iscrita dae Jacopo de Lentini.
Notaju de sa corte de s’imperadore, Jacopo de Lentini est unu de sos fundadores de s’iscola poètica sitziliana. Dante nde faeddat, finas sena de ddu mentuare, in su De Vulgari Eloquentia e in sa Cummèdia Divina, in su versu 56 de su Cantu XXIV de su Purgadòriu, ddi narat il Notaro, in riferimentu a s’arte sua,
Su poete sitzilianu est cunsideradu, in prus, s’imbentore de su soneto, su cumponimentu mètricu a duas cuartinas e duas tertzinas.
Custa sa poesia chi s’autore at iscritu in onore de Adelàsia:
Angelica figura – e comprobata,
dobiata – di ricura – e di grandezze,
di senno e d’adornezze – sete ornata,
e nata – d’afinata – gentilezze.
Non mi parete femina incarnata,
ma fatta – per gli frori di belezze
in cui tutta vertudie è divisata,
e data – voi tuttè avenantezze.
In voi è pregio, senno e conoscenza,
e sofrenza, – ch’è somma de li bene,
como la spene – che fiorisc’e ingrana:
come lo nome, avete la potenza
di dar sentenza – chi contra voi viene,
sì com’avene – a la cità romana.
(gianni muroni)
Leave a comment