Su mare prus amadu dae sos tataresos est in realidade, pro su prus, su mare de Sosso. Sa marina de Platamona, in su golfu de s’Asinara, difatis s’ispàinat a chirru de sa bidda de sa Romàngia.
Su tretu de arenas chi pagu prus a mancu currispondet a su mare tataresu, cumintzende dae sa turre de guàrdia in su tretu de Portu Turres e andende a chirru de Sosso, tenet su nùmene de Abbacurrente.
Su logu tenet un’istòria antiga. Diat pòdere èssere antigu finas su nùmene, segundu un’ipotesi de època bizantina, giai chi in gregu cheret nàrrere marràrgiu ladu o logu de abba, riferidu mancari in s’ùrtimu casu a s’istàniu chi s’agatat a pagu tretu dae su mare.
S’istòria de custu giassu est cambiada a sa fine de sos annos ‘40 de su de binti sèculos, cando su sìndigu de Tàtari Pieroni aiat detzìdidu de dare un’isbocu a mare a sa tzitade, chi esseret a curtzu a su tzentru urbanu. A pustis de duos annos fiat giai abertu su caminu chi dae su caminu istatale 131 a chirru de Portu Turres fùrriat fache a mare.
In pagu tempus fiant nàschidos puru sos primos istabilimentos balneares, Mura e Montalbano e sa rotonda.
In su 1954 Sebastiano Pani, s’impresàriu casteddaju chi in Tàtari aiat cumintzadu cun unu servìtziu de taxi in antis de collegare sa Sardigna cun sos postales suos, aiat chertu issu puru investire in Platamona cun un’istrutura chi duos annos in fatu diat leare su nùmene de Lido Iride.
S’aventura de su Lido Iride, chi in sos annos ‘50 e ‘60 fiat allegradu dae sa presèntzia de personàgios de s’ispetàculu a livellu natzionale, est finida in su 1987.
A s’època de oro de Platamona aiat cuntribuidu puru Salvatore Cottoni, sìndigu de Sosso, chi a pustis, comente assessore a sos Trasportos in Regione, aiat abertu, in sos annos ‘60, su caminu litoràneu chi dae Portu Turres lompet a Casteddu Sardu.
(luca foddai)
Leave a comment