Est cumintzada su 30 de trìulas, cun un’anteprima, s’esibitzione de Frantziscu Medda “Arrogalla”, sa de bintiduas de editziones de su Festival musicale e litaràriu Abbabula, organizadu, che a semper, dae sa cooperativa Le Ragazze Terribili.
Totu sos apuntamentos sunt previstos in Tàtari, in piazza Moretti. S’organizatzione at detzìdidu de presentare ocannu puru ispetàculos musicales e eventos culturales, sena de si firmare pro sas limitatziones sanitàrias.
Su nùmene prus connotu chi s’at a esibire est Samuel, boghe de sos Subsonica. S’artista torinesu s’at a presentare comente solista, acumpangiadu dae àteros duos musitzistas.
Semper dae s’iscena rock arribat Paolo Benvegnù, chi aiat cumintzadu sa carriera artìstica cun sos Scisma. Su cantadore lombardu est arribadu segundu in sa Targa Tenco 2020 pro su mègius discu cun Dell’odio dell’innocenza.
Benit comente solista, che a Samuel, finas Davide Toffolo, de Tre Allegri Ragazzi Morti. S’artista friulanu at a propònnere Andrà tutto benino live, a metade intre mùsica e paràulas.
In sa matessi lìnia est Maledetti Cantautori, s’ispetàculu de Nicholas Ciuferri e The Niro. Contos e cantzones de unos cantos artistas, che a Jeff Buckley e Tom Yorke, leader de sos Radiohead.
Ee paràulas ebbia est fata imbetzes sa performance de Max Collini, ex boghe de sos Offlaga Disco Pax, cun una letura de testos de cantzones de cudda mùsica mutida pro cunventzione indie.
Bebo Guidetti e Lodo Guenzi, de Lo Stato Sociale, ant a offèrrer una letura de sos iscritores Piervittorio Tondelli e Italo Calvino, cun su tìtulu Libertini invisibili. Tondelli vs Calvino.
A sa poesia, a distintu sa de Alda Merini, est dedicada s’esibitzione de Cosimo Damiano Damato, cun su recital Fate l’amore… recital per Alda.
Torrende a sas notas musicales, Cimini at a cantare sas cantzones suas in versione acùstica. Cumpletat su cartellone sa mùsica de Erica Mou.
A prus de sos artistas istàngios su festival at a dare ispàtzios a sas realidades locales. Prevista s’esibitzione de Luigi Frassetto, Lacana, Angela Colombino, sos Ok Ba, sos Between Moons, de Daniela Pes e Mario Ganau.
Su Festival Abbabula tenet su cuntributu de sa Comuna de Tàtari, de s’Assessoradu Regionale de s’Istrutzione Pùblica, Informatzione, Ispetàculu e Isport, de s’Assessoradu Regionale de su Turismu, Artesania e Cummèrtziu e de sa Fondazione Sardegna.
(gianni muroni)
Leave a comment