Abbabula 2023 in S'Alighera

Abbabula 2023 in S'Alighera

Sa de bintighimbe editziones de su festival musicale Abbabula, organizadu che a semper dae Le Ragazze Terribili, at a tènnere a teatru S’Alighera. Logu printzipale de sos ispetàculos at a èssere s’anfiteatru Ivan Graziani.

Si cumintzat su 2 de austu. In Lo Quarter, a sas noe de sero, Francesca Michielin presentat L’estate dei cani sciolti, ispetàculu chi leat su tìtulu dae s’ùrtimu discu suo, Cani sciolti.

Su 4, a sa matessi ora, in s’anfiteatru Ivan Graziani, ant a sonare duos grupos oramai istòricos de su rock italianu: sos Zen Circus e sos Verdena.

S’8, semper a sas noe de sero, in Lo Quarter tocat a s’artista cubana La Dame Blanche, nùmene de arte de Yaite Ramos, cantadora e polistrumentista.

Sa die in fatu, in su pròpiu giassu e a sa pròpiu ora, s’at a esibire su pianista Stefano Bollani, cun Piano Solo.

Su 10 si càmbiat iscenàriu chi at a èssere sas Grutas de Netunu, cun protagonistas artistas sardos. Dae sas ses de sero est programmadu unu biàgiu in barca a chirru de sas grutas cun Nino e la Balena, tìtulu de su libru de Giacomo Casti. S’iscritore, cun s’acumpangiamentu musicale de Luigi Frassetto e Frantziscu Medda Arrogalla, at a lèghere partes de s’òpera sua.

In sas grutas a coa, a sas sete, ant a sonare sos Tazenda.

S’11 si torrat a s’anfiteatru Ivan Graziani cun su cantadore romanu Mannarino chi presentat s’ispetàculu Corde, a sas noe.

Su 12, in una localidade segreta, a sas noe de sero, ant a serrare su festival sos messicanos Son Rompe Pera, autores pro su prus de cumbia, genia de mùsica colombiana populare meda in su paisu nordamericanu puru, chi ammisturant cun sonos de sa traditzione de sa terra issoro e cun sa mùsica rock.

Sos billetes pro Abbabula sunt disponìbiles in sa sede de Le Ragazze Terribili, in bia Roma 144, Tàtari e in sos tzircùitos TicketOne, Mailticket e Boxoffice Sardegna.

(gianni muroni)

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *