Eris, a pustis chi su custode aiat tancadu sas ghennas, sa palatzina de sa Facultade de Geologia, in Casteddu, ue sos istudentes de Limbas faghent letzione, s’est falada a pare. Chie a cuss’ora fiat essende dae sa mensa e chie fiat in sa Domo de s’istudente a pagu tretu, est acudidu a su burdellu cando sos muros che sunt rutos.
In printzìpiu sas noas contaiant de mortos e fertos, ma sas chircas cun canes e drones ant cunfirmadu chi cando est capitadu su disacatu su logu fiat bòidu.
Su Retore de s’Universidade, assustadu ma cuntentu ca nemos at àpidu dannu, at naradu chi como est pretzisu a cumprèndere ite b’at capitadu e si su problema pertocat totu su fràigu. Sos pompieris ant tancadu su tretu a fùrriu de s’Aula Magna de ruga de Trentino e sas letziones las ant a fàghere inlìnia, isetende sa relata tècnica.
S’assòtziu de sos istudentes Reset Unica a sas 10.30 at manifestatu in dae in antis de su retoradu in ruga de Universidade pro revendicare su diritu a s’istùdiu sena tìmere de mòrrere ischerfiados faghende letzione.
Mariantonietta Piga
Leave a comment