– de Salvatore Serra –
Polìtica linguìstica cheret nàrrere finas a publicare istùdios in sardu subra de su sardu, pro mustrare sa capatzidade de custa limba de operare cun unu registru artu.
In s’ischeda de oe bos presento “A dies de oe”.
———————————
Autore
Giuseppe Corongiu
Editore
Condaghes, Casteddu, 2020
Custu traballu, comente narat s’autore, est “unu sàgiu chi acrarit in su minudu comente si fràigat e si impreat una limba comunitària e tzìvica. Un’ascusòrgiu de pensamentos de giudu chi bos at a ispantare e afortigare in s’identidade bostra e cuntemporànea”
S’òpera faghet parte de sa colletzione “Ainas”. Est corredada dae una prefatzione de s’editore e dae una presentada de s’autore. Sa fotografia galana de sa cobertedda, fata dae sa redatzione, mustrat unu tretu de Casteddu in s’interlughes.
dae su capìtulu I, “Su continuum de sa limba culta, formale, istitutzionale”
Pro intelletuales e iscritores meda, finas in su mundu de sas limbas de minoria, sas chistiones de su mundu giurìdicu, de sa limba amministrativa, de una limba istitutzionale de guvernu dàbile, est a nche intrare in unu mundu angenu, misteriosu e finas perigulosu. Gasi est finas pro cussa chi li podimus nàrrere iscritura tzìvica e formale sotziale chi est però unu campu de impreu normale pro unu limbàgiu chi si cheret propònnere comente “normale” e ufitziale.
Pro chi una limba de minoria devèngiat “de majoria”, o si la gherret nessi cun sas àteras limbas, at bisòngiu de essire das sos campos de impreu traditzionales e finas acadèmicos…
Leave a comment