de Mauro Piredda
In s’ìnteri chi chistionamus de Màssimu Pittau (chi torrat a nàrrere su chi naraiat in su 2001) sa Regione sighit a fàghere sos sèberos suos. Custu est su chi leghimus in su decretu 17712 de su 4 de custu mese: «contributos a favore de sas iscolas de s’infàntzia non istatales pro sos gastos de gestione e òneres pro su personale. Programma de sos interventos pro s’annu iscolàsticu 2014-2015… Èuros 18.000.000».
Si abbaidamus s’allegadu bidimus 252 organismos benefitziàrios e petzi 11 iscolas maternas comunales. De su restu s’assessora Firino at «ritènnidu de cunsiderare totus sas iscolas paritàrias». Làstima chi sunt sa parte manna.
Si un’assessora de manca ritenet netzessàriu donare dinare pùblicu a istruturas privadas (e, galu peus, catòlicas) non b’at de s’ispantare si non dat importàntzia manna a sa limba sarda. Est a nàrrere, si sa manca italòfona non faghet sa manca, pro ite devet faeddare in sardu? Tocat a dare sos nùmenes a sas atziones. Ca custos sunt sèberos.
E pro non seberare in favore de sa limba sarda cale si siat cosa andat bene. Finas a fàghere inoghe su chi in aterue si cumbatat. Nos ammentamus, difatis, chi Sel aiat leadu parte a su comitadu chi at ghiadu sa bìnchida in su referendum blognesu de su 26 de maju de s’annu coladu: su 59% de sos chi aiant votadu aiant naradu a manera crara chi su dinare pùblicu (unu millione de èuros) non podiat andare a sas iscolas privadas. A segus de su referendum, sigomente fiat consultivu, su Pd aiat detzisu de non leare in cunsideru su pàrrere de sos eletores. Finas tando sa contrariedade de Sel.
Ma si Bologna est una tzitade bidimus chi in carchi àtera regione Sel at pesadu burdellu contra a custos finantziamentos: in Toscana su cussigeri regionale Mauro Romanelli, pro 2 milliones (9 bortas in mancu de sa tzifra sarda) aiat faeddadu, custu istiu, de «unu tzafu a sos babbos e a sas mamas chi mandant sos fìgios a sos asilos pùblicos».
Como, cunforma a su chi narat sa delìbera 44/15 de su 7 de custu mese, cantos tzafos devet galu retzire sa limba sarda dae custa Giunta? E si de finantziare sas istruturas privadas custa manca non nde podiat fàghere a mancu (!) podiat a su nessi minimare cussa tzifra (chi est manna meda) pro nde pònnere agigu (unu millione?) pro sa limba intre isportellos e sardu curriculare?
Leave a comment