Regione: polìtica linguìstica? Si nde faeddat a s’annu chi benit

Sa Giunta Regionale rinviat totu sa polìtica linguìstica a su 2015. Custu est su chi resurtat a lèghere sa delìbera 44/15 de su 7 de santandria coladu in ue s’assessora Claudia Firino ufitzializat chi s’Ufìtziu Regionale sighit a traballare, ma sas àteras atividades abarrant firmas. S’assessora at acraridu a sos collegas de s’esecutivu chi pro neghe de sos limites impostos dae su Patu de Istabilidade e sas mutzaduras chi nde sunt protzèdidas, sas atividades si sunt firmadas, francu cussas comintzdas in su 2013 e galu no acabadas.

Sende chi custu istadu de cosas at ingendradu s’impossibilidade de una programatzione coerente e atziva de totu sas resursas istantziadas dae sa Giunta Cappellacci, su Pranu Triennale, narat s’assessora, non si podet fàghere. L’amus a fàghere – sighit – in su 2015 cando amus a tènnere su bilantzu aprovadu e amus a ischire cantu amus a pòdere gastare. Sa delìbera est interessante ca donat finas informatziones subra àteras atividades regionales in contu de polìtica linguìstica. Prus a prestu s’assessora riferit de sos contributos a sas emitentes televisivas chi operant in Sardigna e chi sunt galu acumprende sa programatzione 2013, ma sunt isetende novas dae s’Unione Europea pro una chistione de agiudos de minimis. In prus relatat de su bilantzu de sas atividades integrativas de sustènniu a sos ufìtzios territoriales de sa limba semper programadas in su 2013.

Ma sa cosa prus importante de sa delìbera est chi, sende chi in su 2013 s’amministratzione aiat giai programadu s’ufìtziu pro su 2014-15 (pro una chistione de protzeduras contàbiles reiteradas), s’istrale de sas mutzaduras non s’est pòtzidu isfogare subra custu capìtulu e su dinare de s’ufìtziu abarrat a òbligu. Tando, e custa est una nova bona,  sos operadores in fortzas a sas seas de Casteddu e Tàtari podent sighire a traballare nessi pro dòighi meses. Custu a cunfirma de su chi aiat giai iscritu Limba Sarda 2.0 in su mese de Cabudanni chi fiat chi pro fàghere paritzas atividades non b’aiat bisòngiu de su Pranu Triennale ma bastatiat uan simple delìbera comente sa n°44/15.

Pecadu chi sas àteras atividades las apant mutzadas mentres in àteros setores no est andada gasi, comente chi pro sa limba bi siat istada una mirada atenta e una volontade de distrùere totu e finas de fàghere a tìmere sos operadores.  Finas pro su Pranu Triennale b’at àpidu incoerèntzia e dudas tècnicas ca s’assessora aiat in antis annuntziadu una pròroga impossìbile chi difatis posca non s’est fata.