Immagine leada dae venstre.dk
A sa fine de sa chida passada Mette Frederiksen, primu ministru in essida de sa Danimarca, at rinuntziadu a s’incàrrigu esplorativu pro formare unu guvernu nou .
Tropu sas diferèntzias cun sos àteros partidos pro fraigare un’alleàntzia possìbile.
Su re Federicu X duncas at dadu s’incàrrigu a Troels Lund Poulsen (in sa foto), de su partidu liberalcunservadore Venstre. Poulsen at a chircare de formare una coalitzione de destra ponende totu paris sos diferentes partidos de s’àrea. S’impresa diat pòdere èssere possìbile, bida sa cumpositzione de su cuadru parlamentare danesu.
Est seguru in ogna modu chi su tema printzipale chi at a èssere fundadu, s’in casu, su guvernu nou, at a èssere s’immigratzione, massimamente cudda islàmica.
Sa crisi de su Partidu Sotzialdemocràticu, chi mancari siat resurtadu semper su primu partidu, at registradu su peus resurtadu eletorale dae su 1903, est istada causada pròpiu dae sos problemas in polìtica interna.
Semper prus tzitadinos de su paisu iscandinavu cunsìderant s’immigratzione unu problema mannu, chi est destabilizende sa sotziedade danesa.
In sa decraratzione ufitziale de sa Corona de s’8 de maju, chi su re at dadu s’incàrrigu a Poulsen, est iscritu ca sos Cunvervadores, est a nàrrere su Partidu de su Pòpulu Danesu, ant dadu su via lìbera a Puolsen bastis chi leet initziativas pro minimare sa presèntzia musulmana in Danimarca e chi in sa coalitzione noa non siant presentes nen sos Sotzialdemocràticos nen sos Moderados.
Moderados chi issos puru, che a su Partidu de sos Tzitadinos e a s’Alleantza Liberale, ant inditadu a Poulsen. Sos partidos de manca imbetzes aiant chertu chi Mette Frederiksen esseret sighidu cun sas consultatziones.
Poulsen, chimbanta annos, est parlamentare dae su 2001. At tentu incàrrigos diferentes in sos esecutivos de Danimarca, chi s’ùrtimu est istadu ministru de sa Difesa.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment