Si sas natziones perifèricas punnant a s’autonomia, su coro de su poderiu britànnicu vivet una de sas fases prus instàbiles de s’istòria reghente sua. Sas eletziones locales e natzionales de su 7 de maju mustrant sos tres partidos istòricos de Westminster — laburistas, cunservadores e liberaldemocràticos — custrintos a fàghere sos contos cun sa grandu crèschida de Reform UK. Su Partidu laburista de Keir Starmer, chi como est guvernende, afrontat una crisi de metade de mandadu chi no est petzi fisiològica ma fintzas agravada dae una pèrdida de identidade chi est cunsignende parte manna de sos eletores suos a àteros partidos (amus giai faeddadu de sos birdes de Zack Polanski). Sa mèngua in sos sondàgios est crara, mescamente in sas tzitades de su nord, ue sa promissa de istabilidade paret chi no apat giutu sos benefìtzios econòmicos isperados. In forma ispeculare, su partidu cunservadore, ghiadu dae Kemi Badenoch, chircat cun disisperu de si torrare a ligare cun sa base pròpia. Sos tory nche sunt in mesu de sa netzessidade de apàrrere moderados pro non pèrdere collègios in favore de sos liberaldemocràticos e de sa tentatzione de si pònnere in fatu a sa dereta radicale. Su protagonista de custu giru diat pàrrere su movimentu Reform UK de Nigel Farage. Sos sondàgios narant chi su partidu diat pòdere barigare a ambos, tory e laburistas, in tèrmines de votos populares: unu resurtadu chi diat bortulare dae fundu su sistema eletorale britànnicu. Cun una retòrica de dereta chi movet dae su controllu de sas làcanas e dae sa crìtica a sas istitutziones, Reform UK est conchistende cunsensos dae un’ala e dae s’àtera. In fines, sos liberaldemocràticos si cunfirmant comente sa fortza de sa “resistèntzia moderada”, punnende a conchistare sos sègios de sos professionistas urbanos delusos dae su caos cunservadore. Su resurtadu de su 7 maju diat pòdere torrare a disegnare de su totu sa mapa polìtica de su Regnu Unidu, decretende forsis sa fine de su bipartidismu traditzionale.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment