– de Salvatore Serra –
Polìtica linguìstica cheret nàrrere finas a fàghere giornales in sardu, pro afortire sa capatzidade de custa limba de operare cun unu registru artu.
Non podimus fàghere a mancu, duncas, de faeddare de sa revista “Eja”, publicada pro unos cantos annos dae sa sotziedade editoriale “Papiros”.
In custu chi est su nùmeru 6 de su 2011, b’at, in mesu de s’àteru, un’ammentu de Ànghelu Caria e artìculos chi faeddant de s’immersione linguìstica in catalanu, de sa chìmica “birde” de Portu Turre, de sa revista “Nazione sarda”, de s’initziativa editoriale SenaLàcanas E b’at finas un’intervista fata dae Diegu Corràine a Joan Elies Adell Pitarch, chi finas a pagos annos a como fiat diretore de S’Espai Lull, sa sede de sa rapresentàntzia de su guvernu catalanu in S’Alighera . Inoghe pòngio unos cantos passos de s’intervista, in sas partes ispetzìficas chi pertocant limba, identidade natzionale e istandard linguìsticu
- Ite parte tenet sa limba in s’identidade natzionale?
Pro sos catalanos tenet una parte fundamentale. S’identidade natzionale catalana est fraigada istoricamente a fùrriu de sa limba. Est istada un’elementu determinante. Su catalanu est, pro nois, sa colunna vertebrale de sa cultura nostra e de s’identidade nostra
- Cale podet èssere sa funtzione de un’istandard pro una limba che a su sardu?
Sa funtzione de s’istandard est fundamentale in cale si siat protzessu de normalizatzione linguìstica. Creo chi sa LSC devet tènnere una parte chi s’assimìgiat, pro sa situatzione sotziulinguìstica bostra, a sa chi at tentu s’euskara batua (bascu unificadu ) in su Paisu Bascu. Isco chi sa voluntade polìtica, dae bandas de sas istitutziones bascas, de seguru est prus forte meda chi no in Sardigna. Però pesso chi est fundamentale a cumpartzire una limba iscrita comuna, mescamente pro s’amministratzione e s’iscola. Devimus ammentare chi su lema suo est Ekin eta jarrai (“Cumintzare e sighire”): si diat dèvere agatare finas unu lema pro sa LSC, si no lu tenet, pro l’acurtziare a sa gente, e no a sos chi connoschent s’argumentu ebbia. Tocat a fàghere campagnas fortes pro amparare sa LSC.
Leave a comment