3 de austu de su 1492, cumintzat s'impresa de Colombo

3 de austu de su 1492, cumintzat s'impresa de Colombo

Su 3 de austu de su 1492 est sa die chi Cristoforo Colombo est partidu dae Palos de la Frontera fache a sas Ìndias. Su prus esploradore famadu de s’istòria est connotu pro àere iscobertu s’Amèrica, finas si est seguru chi sèculos in antis a lòmpere in su continente nou fiant istados sos vichingos.

In ogna modu est dae su 1492 chi sas duas partes de su mundu partzidas dae s’Otzèanu Atlànticu sunt bènnidas a èssere duas realidades cumplementares.

S’ispeditzione americana tenet galu puntos oscuros. Ipòtesis diferentes esistint subra s’iscopu de sa missione, ideada forsis dae sa Crèsia pro arribare a sa Terrasanta passende dae oriente sena de tènnere s’istorbu de sos moros in su Mediterràneu.

Ma misteriosa est pròpiu sa figura de Colombo. S’òmine de se aiat semper naradu de èssere genovesu ma su logu giustu de nàschida no est seguru. Mancu in sa biografia iscrita dae su fìgiu Fernando essit a pìgiu.

Aterunu elementu de istranesa est chi in sos documentos suos iscritos in italianu denùntziat una connoschèntzia non perfeta de sa limba de Dante.

A agiùnghere mistèriu a mistèriu b’est puru sa firma, galu non detzifrada.

Natziones e pòpulos diferentes s’ant chertu atribuire sa nàschida de s’Ammiràlliu de su Mare Otzèanu: galitzianos, portoghesos, catalanos e giudeos.

Custa ùrtima possibilidade però est istada cantzellada dae sos anàlisis de su dna de sos pagos ossos abarrados de su navigadore.

Una de sas teorias de custos ùrtimos annos nos pertocat dae a curtzu: segundu s’ipòtesi de s’istudiosa indipendente Marisa Azuara, aragonesa, Colombo aparteniat a sa famìllia de sos De Sena Piccolomini, disterrados a Sardigna, e diat èssere nàschidu in s’ìsula nostra.

A custu filone investigativu Azuara at dedicadu un’insaju, unu documentàriu e unu romanzu.

In ogna modu est belle seguru chi custu òmine beniat dae su Mediterràneu e dae custu mare est partidu pro un’impresa chi at cambiadu s’istòria de su mundu.

(luca foddai)

Leave a comment

Send a Comment

S'indiritzu email tuo no at a èssere publicadu.