– de Salvatore Serra –
Polìtica linguìstica cheret nàrrere finas a fàghere giornales in ue b’at artìculos in sardu, pro afortire sa capatzidade de custa limba de operare cun unu registru artu.
Oe bos presento su nùmeru de ghennàrgiu de su 1980 de “Su populu sardu”, mensile polìticu culturale chi essiat in su sèculu coladu. S’editore fiat sa Cooperativa Radiu Supramonte de Nùgoro, sa redatzione e s’amminisratzione fiant in carrera de Sulis, in Nùgoro. In custu nùmeru si faeddat, cun artìculos in sardu o in italianu, de bases militares, de irredentistas irlandesos, de traballu pro sos giòvanos, de fàbricas luadoras, de mìssiles Pershing e Cruise e de àteras cosas medas.
Inoghe apo torradu a iscrìere unas cantas rias de s’artìculu de prima pàgina, in ue si chistionat de polìtica internatzionale.
________
Arrejonos.
Ayatollah e missiles.
—
In s’aera b’at mineta de gherra. Fit dae su 1962, s’annu de sa crisi de Cuba, chi su mundu no s’atzapaiat gai acurtzu a lacanas de gherra. Cal’est su problema, proite sos omines de totu sa Terra sunu minetados de isterminiu?
Peleande sunu un’Istadu, s’Iran, chi s’est illiberadu de trint’annos de tirannia chin d’una rivolutzione populare, e un’ateru Istadu, s’America de su nord, chi pustis de aer azudadu in totu sas maneras su tirannu, como l’at dadu asilu. Pro su populu iranianu, e no pro issu solu, custu tirannu, Reza Palhevi, est unu criminale comunu (at mortu chentinas de miza de pessones, at bendidu a sos americanos sa cultura natzionale de su populu iranianu e cussa de sos ateros populos de s’Istadu, at furadu milliardos e milliardos de dollaros, at fatu creschere sa richesa de sos carrales e de sos parentes suos, e no bastat). E pro custu sos iranianos sun dimandande a sos Istados Unidos s’estraditzione de su tirannu bandidu …
Leave a comment