At chircadu de collonare sos canes antidroga cuende 12 chilos de cocaina pura in intro de una valìgia posta in sa motrice de unu TIR chi trasportaiat pische.
Ma sos canes de su nucleu tzinòfilu de su Grupu de sa Guàrdia de Finàntzia de Terranoa l’ant cassadu e, cun s’acusa de tràficu de droga, sos militares ant arrestadu a un’omine de 55 annos residente in Dècimo, dipendente de una dita de trasportos.
A s’òmine l’ant firmadu in su portu de Terranoa, in pessu isbarcacu dae unu trasportu mertzes, ca pariat in punna de fuire a sos controllos chi faghent a fitianu.
In s’ìnteri de s’esame de sos documentos, sos canes ant singialadu sa presèntzia de droga in sa gabina de guida. Sos finantzieris tando ant detzisu de percuisire su mezu, agatende sa cocaina, partzida in 12 panetos de unu chilu cadaunu, in intro de una valìgia. Marcada cun sa pandera de su Giapone, sa droga una borta bendida podiat frutare prus de 2 miliones de euro.
Sos militare a s’omine l’at arrestadu e, cun s’òrdine de sa Procura de sa Repubblica de Tempiu nche l’ant giutu a su carcere de Bancali.
In sa percuisitzione domitziliare ant agatadu 50 mìgia euro in contante.
S’atividade de su Grupu de sa Guàrdia de Finàntzia de Terranoa est in s’àmbitu de su dispositivu permanente contra a sos tràficos illìtzitos, coordinadu dae su Cumandu provintziale de Tàtari, in sos puntos principales de intrada a su cabu de susu de s’ìsula.
Mariantonietta Piga
Leave a comment