110% agabbadu: pidinu in sas aziendas

110% agabbadu: pidinu in sas aziendas

Su bonus 110% fiat nàschidu in sos annos de sa pandemia pro sustènnere s’edilìtzia, cando fiat totu tancadu pro neghe de su Covid, e dare un’impèllida a fàghere domos chi si caentant e infriscant consumende prus paga energia. S’idea bona, però, no aiat làcanas de cantidade e nemmancu de calidade: cale si siat persone podiat pedire s’agiudu, fintzas si fiat un’azienda rica meda, e non bi fiat unu balore de dinari seberadu pro cada annu. Soddos donados a chie los pediat in sos tempos e in sos modos giustos. Custu at produidu unu dèpidu enorme, chi non si podet prus barigare, mescamente a pustis chi s’Europa at naradu chi non intrat in sas etzetziones de sa pandemia.

B’aiant tres maneras pro giùghere su dinari. Sa prima fiat chi su propietàriu gastaiat sos soddos chi, a pustis, li torraiant in tassas chi non depiat pagare in sos annos imbenientes. Sa segunda fiat s’iscontu in fatura, est a nàrrere chi s’azienda si carraiat sos gastos e posca li pediat a s’Istadu. Sa tertza fiat chi s’azienda o su propietàriu gastaiant sa tzifra e bendiant sos crèditos cun s’Istadu a una banca o a un’àtera azienda e gasi li torraiant deretu su dinari.

Su Cussìgiu de sos Ministros de eris at seberadu de nde bogare sas ùrtimas duas maneras de otènnere s’agiude de Istadu. Como chie cheret fàghere traballos depet àere sos soddos, ca los depet pagare isse, e una cantidade bona de tassas pagadas onni annu dae sas cales s’Istadu potzat bogare sos soddos de s’agiudu. Si in dae in antis los podiant otènnere totu cantos, como petzi sos chi ant su dinari.

Chie at inghitzadu sos traballos paret chi non depat istare in pidinu: sos soddos ant a suprire, non s’ischit cando, ma giai ant a lòmpere. In su mentres aziendas medas, finamentas in Sardigna, sunt firmas isetende de balangiare milliones de èuros dae s’Istadu chi a onni reunione de su guvernu mudat carchi cosa.

(redatzione)

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *