Sos sindacados de sa sede sarda de sa Rai ant detzisu de criticare sa Regione pro su fatu chi no at finantziadu prus sos programmas radiofònicos in limba sarda. Su guvernu regionale a una banda reclamat su reconnoschimentu de su sardu cun s’istadu, a s’àtera cando, in intro de domo, depet gastare faghet, comente si narat in Casteddu, sa “tanalla”. Custu cumportamentu est curiosu e podet èssere chi siat una gestione “polìtica” de su problema de sa limba. Fàghere propaganda petzi pro fàghere callare a sa muda sos intelletuales – pagos – chi si chesciant. In su mentres ochiere totu e lassare colare petzi folklore, dialetu, antigòriu e totu su chi est sardu traditzionale, mesches si no est iscritu. Si nono pro ite non finantziare su sardu in Ràdiu Rai pustis chi l’ant promissu milli bortas.
COMUNICADU DE IMPRENTA RSA SEDE RAI SARDIGNA
Sas RSA de sa Sede regionale de sa Rai crìticant meda su de non chèrrere fàghere nudda de sa Regione Sarda. Sigomente no at rennovadu sa cunventzione cun sa RAI, narant, sa Regione at fatu minimare meda sos ispàtzios dados dae su servìtziu pùblicu pro fàghere connòschere su patrimòniu culturale e linguìsticu de sa Regione nostra, una cosa chi, fintzas a su mese de martzu de su 2015, ant dadu s’agiudu issoro sos mègius intelletuales sardos.
Como sas RSA s’àugurant chi, cando b’est sa programatzione de su bilàntziu regionale, assinnent sos fundos chi bi cherent pro torrare a pònnere sos programas radiofònicos, comente aiat promissu sa Regione etotu. In prus, ammentant chi sa Provìntzia autonoma de Bolzano/Bozen finàntziat su servìtziu pùblicu regionale cun unos 4 milliones de èuros e sa de Trento pagu prus o mancu cun unu milione, cando chi Regione sarda poniat unos 300 mìgia euros.
Sas RSA, in fines, torrant a pedire chi fintzas sa limba sarda, fundamentu identitàriu de s’istòria nostra, siat amparada e avalorada in su Servìtziu Pùblicu.
TRADUZIONE DE SARVADORE SERRA
Mi pare,ca sa’RSA.Appat’à coro,sa tutela de sos lavoratores de su settore.Bisonzat de idere su contrattu collettivu Nazionale itte prevedit pro cussu ispexificu settore chi riguarda sa limba sarda e si riguarda da LSC,ca si calchi ostacoli bi este,bi ad’aere finas una motivu.