S’initziativa chi faghet parte de sa rassinna ligghjmu in gadduresu/leghimus in sardu pertocat sas atividades de promozione e de valorizatzione de su sardu e de su gadduresu e cheret mustrare comente s’impreu de una limba minoritària, comente su sardu o su gadduresu podet èssere “normale” non setzi in àmbitu familiare ma finas pro sa presentatzione de unu libru o de una pellìcula, o pro sas iscritas de impreu pùblicu comente locandinas e avisos, publitzidade, giornales o in àteros cuntestos formales.
In un’època in ue sas culturas e sas limbas minoritàrias arriscant de s’estìnguere, sas initziativas comente custas chi mirant a sa tutela de sas limbas minoritàrias sunt una manera importante pro animare sa diversidade linguìstica e s’educatzione multilinguìstica.
A pustis de sos saludos de su Sìndigu de Badesi Anton Pietro Stangoni (nòdidu comente Toni) s’initziativa at a èssere coordinada dae sa responsàbile de s’Ufìtziu Linguìsticu Provintziale Juvanna Tuffu e at a èssere presentada dae s’autore Franco Fresi e dae s’editore Diegu Corràine.
S’initziativa, in ue ant a partetzipare sos pitzinnos de s’iscola primària e segundària de primu gradu, at a èssere animada dae s’atora Maria Antonietta Pirrigheddu chi at a lèghere carchi cantzu de su libru.
Sas initziativas imbenientes de sa rassinna ligghjmu in gadduresu/leghimus in sardu sunt custas:
- su 18 de santandria in Locusantu,
- su 24 de santandria in Lungoni
- su 2 de nadale in Terranoa