Foto leada dae whitehouse.gov
Sa proposta pro fàghere finire sa gherra intre Rùssia e Ucràina, elaborada dae sos americanos e retzida cun favore dae sos russos, non praghet a su presidente Zelensky. Su capu de istadu ucràinu, in un’intervista a su Wall Street Journal, at cunfirmadu chi est contràriu a tzèdere sa Crimea a sa Federatzione Russa, mancari sa penìsula siat passada, cun unu referendum, giai dae su 2014 suta su cuntrollu de Mosca.
S’atopu de oe 23 de abrile, previstu in Londra intre sas rapresentàntzias màssimas de Istados Unidos, Regnu Unidu, Germània e Frantza, paris cun sos ucràinos, est fallidu.
A pustis de su nono de Kiev a sa proposta negotziale, su Segretàriu de Istadu americanu Marco Rubio e s’emissàriu de Trump Witkoff no ant chertu partetzipare. A cuddu puntu frantzesos e tedescos puru si sunt de facto ritirados mandende cussigeris pro sa seguresa ebbia. Pro sos Istados Unidos s’ùnicu presente fiat su generale a riposu Kellogg.
Est sa cunfirma chi sa solutzione de su cunflitu est in manos americanas e russas ebbia.
Su presidente Trump, in un’interventu in su mèdiu de comunicatzione sotziale suo Truth, at iscritu ca sa decraratzione de Zelensky est perigulosa pro sas tratativas de paghe. «Podet tènnere paghe o podet gherrare àteros tres annos e pèrdere su paisu intreu», at sighidu.
E at agiuntu: «Non tèngio nudda ite bìdere cun sa Rùssia ma tèngio ite bìdere meda cun sa volontade de sarvare in mèdia chimbe mìgia sordados russos e ucràinos a sa chida, chi sunt morende pro peruna resone».
In prus at definidu a Zelensky “s’òmine sena de cartas de giogare”, espressione chi aiat giai impreadu in direta televisiva in sa vìsita ufitziale de su presidente ucràinu in Washington su 28 de freàrgiu coladu.
Un’atopu intre Steve Witkoff e Vladimir Putin est in programma chenàbura 25 de abrile. Witkoff est istadu in Rùssia giai tres bortas in custos ùrtimos meses.
Leave a comment