Un’istùdiu nou de s’Universidade de Berkeley, in California, at bogadu a campu unos cantos datos chi cunfirmant sos timores de sa furriada annuntziada dae Mark Zuckerberg pro su chi pertocat moderatziones in sas prataformas Meta. Sende chi su mere de Facebook at naradu chi nch’at a bogare sos controllores fact-checker pro sighire «sas notas comunitàrias che a sas de X». E pròpiu s’ex Twitter est s’ogetu de s’indàgine mentovada a comintzu, ca dae sos meses a pustis de s’intrada de su mere nou sos tassos setimanales in contu de òdiu impuntzadu sunt crèschidos de su 50%. Sa chirca l’ant publicada in sa Public library of sciences.
Custu est su chi b’est iscritu in s’abstract: «Sa crèschida la bidimus in dimensiones diferentes de òdiu comente ratzismu, omofobia e transfobia. De prus, registramus unu raddòpiu de sos “m’agradat” in post de custa casta. Averguada finas sa presèntzia de contos chi non sunt autènticos in sa prataforma, medas bortas impreados pro campagnas de spam e de informatzione malèsiga. No amus agatadu peruna ridutzione (si non s’aumentu) de s’atividade de custos utentes a pustis de sa còmpora de Twitter; cosa chi diat pòdere inditare unos cantos èsitos negativos comente su potentziale de trampas, interferèntzias in sas eletziones o dannos a sas campagnas de salude pùblica».
Una fotografia chi contraighet su chi su mere nou de sa prataforma aiat naradu sos meses de abrile («Nch’amus a bogare sos bot de spam o amus a mòrrere proende·bi») e de nadale de su 2022 («Sas impressiones de òdiu sighint a minimare mancari sa crèschida de sos utentes»). S’autore printzipale de custu istùdiu est Daniel Hickey, dotorandu a su primu annu de sa School of Information de s’Universidade mentovada de Berkeley. E custas sunt sas paràulas suas: «Pro bìnchere sos disafios prus urgentes de sa sotziedade comente su cambiamentu climàticu, sa povertade e s’atzessu a s’assistèntzia sanitària, amus bisòngiu de cooperatzione e de ambientes de informatzione chi la favoressant. Est cosa de importu, duncas, a monitorare sas prataformas sotziales pro individuare cumportamentos antisotziales».
Gianfranca Orunesu
(Foto de John Petalcurin)
Leave a comment