Si narat Vulcan e devet traballare in sos magasinos de sa mercantzia de nch’imbiare a sos clientes. Su setore est su de sa logìstica ma non semus faeddende de unu dipendente. Vulcan est unu robot chi Amazon at isvilupadu e chi cheret impreare pro sa chirca de sos produtos in sos parastàgios suos. Pro more de unos cantos sensores in sa “manu”, custa màchina tenet duncas una capatzidade particulare: sa de reconnòschere sas cosas a parpu.
Vulcan, chi l’ant presentadu su 7 de maju in unu tzentru de distributzione de Amburgu, in Germània, est giai traballende. In cue, ma fintzas in un’istabilimentu americanu de Spokane (istadu de Washington). Sa punna, a su chi narant, est filàntropa. Pro un’iscuta lassemus pèrdere sas cunditziones e sos ritmos chi sos dipendentes devent rispetare e limitemus·nos a nàrrere chi a Vulcan l’ant a impreare pro su chi b’est in sos parastàgios sos prus artos e sos prus bassos, in ue su traballadore umanu leat meda prus podda. Ma est fintzas beru chi s’operaju b’at a dèvere lòmpere su matessi, in bassu e in artu, totu sas bortas chi su robot narat de no agatare su chi est chirchende. S’idea de Amazon est sa de automatizare galu de prus su traballu chi a su presente lu faghent sos òmines e sas fèminas dipendentes de s’azienda. Si est beru chi in sos ùrtimos annos sa dita at introduidu robot a tretu de pigare pacos e iscàtulas pro nche los giùghere a aterue, est beru finamentas chi su de nche pònnere e de nche pigare sos produtos dae sos parastàgios dipendet dae su traballadore e dae sas capatzidades suas.
De cada manera Aaron Parness, diretore de s’IA robòtica de Amazon, narat chi s’obietivu est su de nche lòmpere a su 75% de automatzione. In su setore est prus chi no inchesa s’allega in contu de ocupatzione: b’at chie narat chi podet minimare e b’at chie faeddat de ruolos noos pro su personale.
Gianfranca Orunesu
(Immàgine dae https://www.aboutamazon.it/)
Leave a comment