de Anthony Muroni
Pro ispiegare sa psicologia de sos èsseres umanos diat tocare a fàghere sa matessi pregunta a pòpulos diferentes.
Si si giogaret una partida Real Madrid-Bidda Fraigada in cantos diant èssere a favore de su Real Madrid e in cantos de su Bidda Fraigada?
Sa lògica diat impònnere chi totu sos abitantes de Madrid e totu sos abitantes de Bidda Fraigada, esserent cada unu a favore de s’iscuadra issoro.
E imbetzes s’esperièntzia nos narat chi non diat èssere gasi.
In Madrid, a seguru, unu 10% si nde disinteressat de su totu. De su 90 chi restat, nessi unu 70 diat andare a favore de su Real. Forsis unu 15 diat istare “contra”, ca est fatu gasi, e unu 5% diat andare a favore de Bidda Fraigada, ca “deo mi do a s’ala de sos dèbiles, de sos malassortados, de sos idealistas”.
E in Bidda Fraigada? Su 10% forsis si nde diat disinteressare e de su 90 chi restat, non prus de su 40 diat andare a favore de s’iscuadra locale. S’àteru 50% si diat partzire intre sos chi “ma a ue cherimus andare”, “abba’ chi cuddos sunt prus fortes”, “no ischia nemmancu chi in Bidda Fraigada b’esseret un’iscuadra, “ma pro ite non giogant contra de su Monterra o Sos Paris?”, “e giai l’amus a bìdere si ant a rìere a pustis de àere pèrdidu 10 a 0”.
Nois giogamus finas pro custu. Finas pro custu, non petzi pro custu.
Nois giogamus pro fraigare una grandu rivolutzione culturale chi torret a costituire una grandu comunidade de progetos in Bidda Fraigada.
Una comunidade solidale, aunida, capassa de tènnere ispera in su benidore e in sas impresas prus difìtziles e non prus una summa de egoismos e imbìdias isparghinadas.
Unu votu a AutodetermiNatzione, su 4 de martzu, at a èssere fintzas custu.
Leave a comment