In bonu o in malu, sa lògica de sas noas custa est. De su ludu de Bitzi nde semus faeddende semper prus pagu mancari su problema siat galu atuale e mancari sos ogros de sa bidda siant semper mirende a sas àeras. Intre sos chi imbetzes tenent àteras miradas b’at chie nd’at faeddadu sas dies coladas proponende de fàghere mòvere dae cue sa campagna de screening annuntziada·nos dae sos palatzos regionales.
Sa cosa chi nos diat dèvere dare pensamentu, però, est chi non semus faeddende prus nemmancu de su “Protocollo Bitti“, una proposta comunitària cun punnas subralocales nàschida in antis chi calicunu si sapiret de cussa bidda e cuntzepida cando chi in cussos tretos b’aiat problemàticas graes cun su virus. Cussu “protocollu”, chi cheret analizadu in bonu e in malu, e chi cheret iscumporadu che a cale si siat proposta, est isparèssidu dae s’agenda.
Pro seguru in Bitzi sunt pensende a comente evitare un’acontèssida che a sa de pagas chidas a como. Ma est beru finamentas chi, pro seguru, dae artu non podent èssere interessados a una proposta dae bassu como chi b’at de pompare su remèdiu ufitziale cundidu cun un’ingrediente chi lompet dae Vènetu.
In s’ìnteri professor Crisanti, giai una presèntzia in sas trasmissiones tv de sas emitentes sardas, comintzat a partzire mèritos e neghes eventuales: «Si amus a lòmpere a custu resurtu (ìsula covid free conca a s’istiu, ndr) nche lu ponimus in manos de sa polìtica, chi devet èssere a tretu de lu preservare» (in s’Unione de eris, movende dae su programma Monitor). In custa lògica de sas noas nos ismentigamus de sas manos de sa polìtica in antis de custa fase. E finamentas Crisanti – chi in abrile proponiat unos cantos esperimentos pro custa terra – si nd’est ismentigadu narende chi «sa Regione at traballadu bene».
S’istiu coladu nânt chi sa Sardigna fiat covid free finas a sa lòmpida de sos turistas privos de patente sanitària. Nânt chi s’istadu italianu at fatu fìgios e figiastros impedende a sa Regione sarda de fàghere cun sos terramannesos su chi Zaia at fatu cun nois ponende·nche sa Sardigna in pare cun Croàtzia, Grètzia, Malta e Ispagna.
Ma sa diferèntzia est chi sos tampones in s’aeroportu de Venètzia fiant voluntàrios. Solinas los cheriat obligatòrios pro sos turistas de sas àteras regiones ischende chi non podiat. Ma tando, a dae chi finamentas su “pranu Crisanti” non previdet òbligu, pro ite sa Regione no at fatu custa campagna in istiu? Si est beru chi sa Sardigna fiat covid free costaiat pagu a lu fàghere cun unu campione prus minore e a tesu dae sa campagna de vatzinatzione. Totu cantos aìamus pòdidu nàrrere sena problemas chi «sa Regione at traballadu bene».
Como Solinas at incassadu su pàrrere positivu de s’ex presidente Pigliaru e s’opositzione oe paret muda: nemmancu prus de su “Protocollo Bitti” (su sìndigu est Pd) paret faeddende.
Ma si in custas dies sos casos de cuntàgiu resurtados sunt in mancu (eris fiant 168, gianteris 30 de prus, gioja su 10 fiant 248 e sa die in antis 253), e si sa Regione nos narat de nch’èssere lòmpida a su 75% de sos obietivos suos in contu de letos e mèigos, a bisu de calicunu mortos e cuntagiados, ricòveros in intensiva e ambulàntzias in fila «non parent minimados pro nudda».
Faeddos de Massimo Dadea, assessore (in pare cun Pigliaru) de sa Giunta Soru, in intro de un’arresonu prus mannu in ue bogat a campu sos perìgulos de unu screening in cuntemporànea cun sos vatzinos. A bisu suo sa lògica de sas noas cheret iscumproada in àteros cugiones de sos giornales. «Isparèssidos dae sas primas pàginas de sos cuotidianos e dae sos telegiornales», narat cussigende·nos de fàghere un’iscumprou indiretu: «Est pretzisu a abbaidare su nùmeru de sas pàginas de sos necrològios presentes in sos duos giornales sardos, mai medas che a como».
Faeddos chi sighint s’allega de chie cun sos mortos bi traballat. Che a sos de cudda agentzia fùnebre nugoresa chi, a concruos de santandria, cuntestaiat sos nùmeros ufitziales. Faeddos narados pagas dies in antis chi a su contu b’aerent annantu 43 persones finas a tando lassadas in foras dae sos bulletinos.
Màuru Piredda
Leave a comment