Sa Repùblica Democràtica de su Congo est bivende una situatzione de caos polìticu e sotziale chi est a puntu de iscadenare una gherra tzivile. In sa capitale Kinshasa, s’ex Leopoldville, manifestantes ant atacadu sas ùrtimas duas dies sas ambasciadas de Istados Unidos, Frantza e Bèlgiu, Uganda, Kenya e Ruanda.
A iscadenare sas protestas violentas est su chi est capitende a s’ala de sa làcana cun su Ruanda.
Militzianos rebelles de su movimentu M23 si sunt impossessados de sa regione de su Kivu Nord, cun capitale Goma.
Sunt pro su prus ex sordados de s’esèrtzitu regulare chi su sunt ammutinados in su 2022. Càusas de s’instabilidade sunt sos sòlitos motivos tribales, chi tantu trìulant e sunt triulende s’Àfrica.
Sos gherrilleris sunt de etnia Tutsi e si cunsìderant discriminados e postos a un’ala in s’amministratzione istatale de sa repùblica.
Dae printzìpiu ant otènnidu s’agiudu de su Ruanda, chi cheret aprofitare de sa situatzione pro controllare su territòriu de Goma.
Sa resone est massimamente econòmica. Su logu difatis est ricu de columbite-tantalite, mègius connotu comente coltan, unu minerale fundamentale pro sa produtzione de telefoneddos.
Sa pèrdida de sas minieras de coltan controllada dae s’M-23 diat rapresentare unu disafiu mannu pro sa Repùblica Democràtica de su Congo e su cunflitu dae locale diat pòdere bènnere a èssere una gherra intre duos istados.
Sa RDC e su Ruanda, paris, tenent sa majoria de sa produtzione mundiale de custu materiale.
Pro istadu erede de su Congo Belga non ddo’at paghe. Unu de momentos de peus crisi fiat istadu, in sos annos ‘60 de su sèculu coladu, su de sa rebellia de su Katanga, cuddu puru logu ricu dae su puntu de bista mineràriu.
A coa su paisu at connotu sa ditadura de Mobutu, chi aiat mutidu s’istadu Zaire, pro cantzellare sa rasta de sos colonizadores finas a livellu toponomàsticu.
(gianni muroni)
Leave a comment