Sa violèntzia contra a sas fèminas nche lompet a sa realidade virtuale che chi non bastaret su chi acontesset in su mundu reale. Sa nova est de pagas dies e si nch’annanghet a sa rassigna de sos chi sighint cun atentu su fenòmenu. A una pitzinna de 16 annos l’ant molestada e violentada una truma de avatar maschiles in unu videogiogu immersivu. S’episòdiu grae, una cosa chi cunfirmat sos oriolos de cantos aiant fatu apellu a s’atentzione fintzas in custos ambientes, est ogetu de un’indàgine aberta dae sa politzia britànnica: gasi, pro sa prima borta, unu crìmine cummìtidu in su metaversu est tratadu dae sas autoridades.
Sa minore at sufridu unu tràuma psicològicu cun cunsighèntzias graes. S’episòdiu nde bogat a pìgiu sa chistione de s’impatu emotivu de sos crìmines virtuales e, duncas, de sa netzessidade de una regulamentatzione pro prevènnere e tratare custa tipologia de reatos.
Sa realidade virtuale, est cosa chi ischimus, l’ant progetada pro èssere immersiva e pro ofèrrere un’esperièntzia sa prus serente possìbile a sa realidade. No giuat a sutavalutare sos efetos de sas acontèssidas in su metaversu, mescamente si sunt tràumas o eventos de violèntzia. E si faeddamus de minores, sa chistione est prus delicada ca sa psiche issoro est in fase de isvilupu e unu tràuma, mancari virtuale, podet cajonare dannos psicològicos cun reatziones in sas dinàmicas relatzionales e in sa pertzetzione de su mundu. Gasi, su dolore in su metaversu si fùrriat a dolore tangìbile e reale.
Comente fìamus narende sa nova est de pagas dies, ma su de ocannu no est petzi s’ùnicu episòdiu, ca sas molèstias in su metaversu bi sunt dae tempus. Pro nàrrere, in su 2022 Nina Jane Patel, psicoterapèuta chi conduet chircas in cussu ambiente, aiat contadu de àere sufridu violèntzia sessuale in su videogiogu Horizon Worlds de Meta.
Gianfranca Orunesu
Leave a comment