Cando faeddamus de veturas elètricas, sa prima problemàtica chi nd’essit a campu est sa de sas baterias. De sas baterias a su lìtiu. Pro ite? Ca b’at perìgulos de seguresa in contu de intzèndios e esplosiones; ca sos costos de produtzione sunt bastante artos; ca tocat a pònnere in contu sa sensibilidade issoro a sas temperaduras estremas; ca tocat a faeddare pro fortza de su degradu issoro e de s’impatu ambientale ligadu a s’estratzione de sas matèrias primas e a s’ismaltimentu. Una nova chi nch’intrat in custu arresonu est lompende dae sa Tzina. Sa Changan Automobile at detzisu de punnare a una resursa chi est fintzas prus bundante: su sale.
Cun sa presentatzione de s’istrategia sua noa, sa cumpangia non s’est limitada a mustrare protòtipos, ma at fintzas proadu in s’istrada sa Nevo A06, sa prima vetura alimentada dae baterias cun iònios de sale. Custa mossa at a cambiare sos giogos? Est galu chitzo pro lu nàrrere. Ma carchi cunsideru cheret fatu. Unu pertocat sas giai mentovadas temperaduras: sas baterias de lìtiu sufrint su fritu; sas tzellas de sòdiu diant dèvere imbetzes mantènnere prus de su 90% de sa capatzidade fintzas a 40 grados suta su zeru. Ma no est petzi una chistione de clima. In contu de seguresa narant chi in sas proas de abusu estremu sas tzellas Naxtra no ant dadu sinnales de fumu o de framas. De prus: s’impatu ambientale est minore gasi comente minores sunt sos costos de estratzione. Su sòdiu est belle 400 bortas prus bundante de su lìtiu e podet èssere bogadu dae cada logu in ue b’apat sale marinu o carbonadu de sòdiu trunchende, de custa manera, sa dipendèntzia geopolìtica dae pagos fornidores.
Pro su mercadu europeu (in ue s’automotive est in crisi) s’adotzione de su sòdiu diat pòdere fàghere a manera chi sas veturas elètricas nch’istent in suta de sa sòglia psicològica de sos 20mìgia èuros sena intzentivos istatales. Custa istrategia punnat a nche brincare su paradossu econòmicu e ecològicu de s’elètricu: prejos atzessìbiles e indipendèntzia dae materiales raros comente cobaltu e nichel, materiales catòdicos detzisivos pro sas baterias de iònios de lìtiu. Su sòdiu s’est duncas candidende a èssere su motore de sa mobilidade de massa, segura e sustenìbile.
Gianfranca Orunesu
(Foto de Daniel Andraski)
Leave a comment