Sa procura natzionale venetzuelana at ordinadu, su 2 de cabudanni coladu, s’arrestu de su candidadu de s’opositzione a sas presidentziale de su mese de trìulas coladu, Edmundo González. S’òrdine de arrestu est istadu cunvalidadu dae su Tribunale de prima istantza.
S’acusa est de usurpatzione de funtziones, istigatzione a sa disubidièntzia de sa lege e cospiratzione. Totu naschet dae sa publicatzione in internet, dae parte de sa PUD, sa Plataforma Unitaria Democrática, sa coalitzione de sos oposidores a su presidente Nicolás Maduro, de documentos chi afirmant s’esistèntzia de trampas eletorales, in sas presidentziales de su 28 de trìulas, in favore de Maduro etotu.
González sos ùrtimos tempos s’est fatu a bìdere pagu e nudda in pùblicu, tantu chi in s’ùrtima manifestatzione contra a su guvernu in càrriga at leadu sa paràula sa lider de s’opositzione, María Corina Machado.
S’avocadu suo at naradu ca s’òmine est bivende in clandestinidade, cambiende domo ogna die, ma non cheret lassare su Venetzuela.
In s’ìnteri, su 3 de cabudanni, in un’atopu pùblicu, su presidente Maduro at decraradu ca “cando apo a lassare s’incàrrigu, cando at a tocare, dd’apo a lassare a unu presidente, o a una presidente, chavista, bolivariana e rivolutzionària. Cando at a tocare…”
Sete paisos latinoamericanos ant cundennadu sa detzisione de fàghere arrestare a González: Argentina, Costa Rica, Guatemala, Paraguay, Perù, Repùblica Dominicana e Uruguay. Sa matessi positzione dd’at espressada su segretàriu de s’Organizatzione de sos Istados Americanos, s’uruguayanu Luis Almagro.
Brasile e Colòmbia, paisos chi tenent una positzione prus favorèvole cun su guvernu de Maduro, in unu comunicadu unitàriu, ant fatu a connòschere su pistighìngiu issoro pro una detzisione chi ponet in perìgulu una solutzione patzìfica intre sas partes polìticas in Venetzuela.
(gianni muroni)
Leave a comment