Su 28 de trìulas coladu su Venetzuela at tzelebradu sas eletziones presidentziales, bintas dae su presidente in càrriga Maduro. S’opositzione però no at mai reconnotu sos resurtados acusende su guvernu de trampas eletorales.
Oe 28 de austu, unu mese a coa, sa Plataforma Unitaria Democrática (PUD) at organizadu manifestatziones de mìgias de persones in paritzas tzitades de su paisu, cumintzende dae sa capitale Caracas.
Fiat presente sa lider de s’opositzione, María Corina Machado, mentras non ddoe fiat su candidadu a presidente, Edmundo González Urrutia. Machado fiat istada seberada comente candidada de sa Plataforma in sas primàrias de santugaine de su 2023 ma su Cussigiu Natzionale Eletorale aiat annulladu su resurtadu e proibidu a Machado etotu de su presentare a sas presidentziales. Pro cuddu motivu sa PUD aiat dèpidu presentare aterunu candidadu, est a nàrrere González.
In sa capitale Machado at naradu ca su presidente elègidu est pròpiu González, cun oto milliones de votos e chi mancu unu de sos guvernos democràticos de su mundu at reconnotu sa rieletzione de Maduro.
Sos datos ufitziales narant ca su presidente in càrriga, candidadu pro su Partidu Sotzialista Unidu de Venetzuela, at bintu cun su 51% de sos votos; a s’àtera ala sa coalitzione PUD afirmat ca est imbetzes González su binchidore cun su 67% de sas ischedas.
S’Unione Europea no at reconnotu s’èsitu de Maduro e in antis de s’espressare pedit una cumprova indipendente de sos votos. Ddo’at paisos imbetzes chi ant reconnotu a González comente capu de istadu legìtimu. Sunt: Istados Unidos, Costa Rica, Pànama, Ecuador, Perù, Argentina e Uruguay.
Su paisu sudamericanu s’agatat duncas partzidu in duos, cun unu setore de sa populatzione fidele a s’ideologia neobolivariana e sotzialista e un’àteru chi pedit unu càmbiu de trajetòria.
In ogna modu su paisu est pro su momentu paralizadu dae su puntu de bista polìticu.
Sa de oe est s’ùrtima de una sèrie de manifestatziones de s’opositzione, chi at giai annuntziadu àteras formas de protesta.
(gianni muroni)
Leave a comment