Su V-Day est arbèschidu. Sas primas doses de vatzinu (una cantidade simbòlica cun 180 fialas de sas primas 9750 pro totu Itàlia) sunt lòmpidas a Su Masu eris a de note. Destinatzione ospidale Brotzu. A Silverio Piro, 71 annos, infetivòlogu, e a Virginia Boi, 58 annos, coordinadora infermierìstica, bi l’ant in pessu somministradu. In custas bator dies at a tocare a àteros 178 operadores sanitàrios fintzas in sos ospidales oncològicu, microtzitèmicu, “Santissima Trinità” e policlìnicu de Pauli. S’otimismu est a su primu puntu in s’agenda de sos guvernantes in Roma e in Casteddu. E fintzas in sa de sos mèdios de comunicatzione chi, bugiardinu in manos, saludant su die de oe comente una data istòrica pro s’umanidade. A belle un’annu dae su comintzu de sa pandemia e de sas restritziones, a pustis de meses de richesa in mancu e de persones chi galu aiant deretu de bìvere, b’at petzi de isperare.
de Màuru Piredda
Sas primas somministratziones cumbinant cun sa serrada de sa zona ruja natalìtzia (dae cras torra in colore de Arantzu finas a su 30, posca torra ruja dae su 31 a su 3 e dae su 5 a su 6). Paret chi, duncas, custu vatzinu nche lompat a inoghe comente unu donu de Pasca, comente una bona ura pro s’annu nou chi est in cue acarende·si e nois mirende·lu cun sa gana de nos nche lassare a palas meses de istòria umana chi petzi sos iscientziados prus abbistos si podiant immaginare. Sos nùmeros e sos tempos sunt sos chi ponent carchi duda. Dae su mese ch’intrat sa campagna at a sighire cun su personale sanitàriu de totu sa Sardigna e cun sos chi bivent e traballant in sas residèntzias de pasu. Petzi a pustis sas àteras categorias inditadas dae su pranu ministeriale: ultraotantennes, persones dèbiles e cun àteras patologias, traballadores de sos servìtzios essentziales e de sas fortzas de s’òrdine, sessantennes e, a concruos, totus sos àteros. Sas datas galu non bi sunt e no amus idea de cantos ant a pigare parte a sa campagna, a dae chi non b’at òbligu.
Intre sos chi non s’ant a vatzinare oe b’est Andrea Crissanti, su diretore de su laboratòriu de Microbiologia e virologia de s’azienda ospidalera de Pàdua. Su professore, chi in Sardigna ghiat su pranu regionale “Sardi e sicuri” cun sos test de massa, at naradu chi s’at a vatzinare cando li tocat, «sena paliatzadas». Faeddos cruos chi bene si còjuant cun sas primas decraratziones suas pro sa terra nostra, cando nât chi non b’aiat bisòngiu de vatzinos, chi cun su pranu suo (mancari in antis aeret naradu de non crèere a sos test ràpidos) si diant pòdere isulare sos positivos pro nche torrare sa Sardigna a livellu covid-free. A bisu suo petzi a concruos de su 2021 amus a resèssere (in Itàlia) a vatzinare 44 milliones de persones pro chi nche lompamus a s’immunidade de comunidade. Gasi imbetzes s’assessore regionale Nieddu: «Isperemus chi siat su comintzu de s’essida dae su tunnel tristu de su Covid. Oe b’at pagas doses, ma giai dae cras nche nd’ant a lòmpere prus de 4mìgia».
Ma s’Aifa, s’agentzia italiana de su fàrmacu, ite narat? Chi «duas doses de vatzinu somministradas a 21 dies s’una dae s’àtera podent impedire a su 95% de sos adultos dae sos 16 annos in susu de isvilupare sa maladia»; chi «su vatzinu faghet efetu a pustis de una chida dae sa segunda dose»; chi «su tempus de amparu no est galu definidu ca su perìodu de osservatzione fiat de pagos meses» ma chi «diat dèvere èssere a si nessu de 9-12»; chi «bi cheret prus tempus pro otènnere datos significativos pro mustrare si sos vatzinados si podent infetare a manera asintumàtica e cundire àtere». Duncas sos vatzinados e sos chi intrant in cuntatu cun issos devent sighire a s’amparare cun sos dispositivos anticovid. Sa Faq 31 est fintzas prus crara: «B’at a èssere semper una parte de vatzinados chi no ant a isvilupare sa difesa immunitària».
E in Sardigna? Bidas sas caraterìsticas demogràficas de sa populatzione, bida sa presèntzia elevada de patologias crònicas e degenerativas ma finamentas de maladias tumorales e autoimmunes (nche semus in intro de sas categorias prioritàrias inditadas dae su pranu ministeriale), cantos vatzinos nos nch’ant a batire dae Roma? E custa campagna de vatzinatzione comente s’at a cumbinare cun su pranu Crissanti? E in s’ìnteri chi sa riforma sanitària de sas oto Asl tardat a mòvere (pro more de su covid, nânt chi) pro ite non pensamus a una sanidade prus serente a sas comunidades?
fonte imàgine: sardiniapost.it
Leave a comment