de Salvatore Serra
S’UZEI (Unibertsitate Zerbitzuetarako Euskal Ikastetxea – Iscola Basca de Servìtzios Universitàrios) est unu tzentru de terminologia e lessicografia. Si tratat de un’entidade fundada in su 1977 cun s’idea de rennovare s’euskera pro l’adatare a su mundu modernu, a manera chi cada bascu lu podat impitare in forma adeguada e pretzisa in cale si siat cuntestu.
In su 1987, cunforma a su Decretu 226/1987 e cun sa firma de un’acordu de collaboratzione, s’est costituidu comente assòtziu cun s’amparu de su Guvernu Bascu pro fàghere istùdios in matèria de planificatzione linguìstica.
In su 1989 su Guvernu Bascu l’at cuntzessu su “Reconnoschimentu de Utilidade Pùblica” pro sos servìtzios suos in sos istùdios linguìsticos e in su promovimentu de òperas de interessu generale in sa Comunidade Autònoma Basca.
Su motore printzipale de sa creatzione de unu corpus istatìsticu de s’euskera est istadu pròpiu s’ UZEI, chi at definidu mètodos ispetzìficos, a un’ala, pro fàgher un’inventàriu de s’impreu de sa limba, a s’àtera, pro definire una mustra istatìstica chi esseret una “istantànea bona” de totu sos testos.
In custu àmbitu est nàschidu in su 2007 s’Osservatòriu de su Lèssicu, pro initziativa de Euskaltzaindia, a proposta de su Grupu de Traballu de su Ditzionàriu Unificadu, e in colaboratzione cun UZEI, cun su Grupu Ixa e cun Elhuyar.
Su resurtadu de su progetu est su corpus chi tenet su matessi nùmene, chi si podet consultare in lìnia.
Finas a como sunt istadas insertadas 60 milliones de paràulas. Su corpus si protzessat e s’etichetat linguisticamente in manera automàtica, e proponet a s’usuàriu sa funtzionalidade de consulta tìpica de sos corpus linguìsticos.
Leave a comment