S’amministratzione Trump at integradu a intro de su Dipartimentu de Istadu s’Usaid, United States Agency for International Development, chi finas a como fiat indipendente. Pro 90 dies sos finantziamentos sunt blocados e su prus de sos dipendentes lissentziados. A ghiare s’operatzione chi azerat, de facto, s’agentzia, ddo’est su DOGE, Department of Government Efficiency, istituidu dae Trump e ideadu e controlladu dae Elon Musk.
S’Usaid est nàschida in su 1961. Sos obietivos decrarados fiant e sunt sa collaboratzione sotzioeconòmica, s’agiudu contra a sa povertade e sas catàstrofes naturales in sos paisos istràngios.
Cun su passare de su tempus s’Usaid s’est dedicada a operatzione de propaganda e disinformatzione. Est istada ativa meda in s’Amèrica Latina de sos annos ‘70 de su sèculu coladu, pro nàrrere, in funtzione anticomunista.
In sas ùrtimas dècadas, a pustis de sa fine de s’Unione Soviètica, ddo’at àpidu unu càmbiu de paradigma polìticu de sos USA, teorizadu dae sos neocunservadores, pro esportare sa democratzia, de marca otzidentale, in totue.
Custa visione globalista est istada adotada dae sos democràticos puru, in modu chi si podet bìdere una continuidade intre sas diferentes amministratziones.
Dae issara s’Usaid at dadu unu cuntributu fundamentale a sa penetratzione polìtica e culturale americana in àreas delicadas, che a sos Balcanos e sa Sìria, in manera direta o pro more de Organizatziones Non Guvernativas, pro pònnere suta controllu istados intreos, faghende·ddos in antis alliniare a livellu sotziale e culturale.
Intre sas atividades finantziadas dae s’Usaid in custos ùrtimos annos ddoe sunt, pro nàrrere, un’òpera transgender in Colòmbia e unu fumetu transgender in Perù.
Cun sa limitatzione manna de s’agentzia duncas s’amministratzione Trump, a prus de abbandonare custos temas de manca caros a sos democràticos, cunfirmat de adotare una polìtica neoisolatzionista.
Su casu Usaid est sa dimustratzione chi s’atzione de agentzias guvernativas e de ONG no est mai nèutra, ma tenet semper a segus un’indiritzu polìticu craru.
(gianni muroni)
Leave a comment