Domìniga 13 de trìulas, in Uri, a sas 19,45 in pratza de sa crèsia de Nostra Segnora de sa Pasciènscia, su sòtziu Dolci Accenti proponet su cuntzertu de mùsica baroca Storie spagnole del siglo de oro, pro su festival Note senza tempo, chi faghet parte de su tzircùitu europeu de festival de mùsica antiga REMA.
Pro Dolci Accenti ant a sonare: Calogero Sportato a s’artziliutu e chiterra ispagnola, Daniele Cernuto a sa viola de camba, Andrea Lubino a sas percussiones e Alberto Sanna a su violinu baroco. Sanna, musicòlogu, est diretore artìsticu de sa Early music as education de Liverpool e de s’orchestra giovanile Early Music Youth Orchestra.
Sa die est in programma finas S’afidu a s’antiga, rievocatzione de su cojuiu traditzionale.
A sa manifestatzione, insertada in su programma Salude&Trigu de sa Càmera de Cummèrtziu de Tàtari e organizada dae Dolci Accenti cun su cuntributu de R.A.S., Fondazione di Sardegna e Comunas de Uri, Portu Turres e Monteleone, collàborant finas su sòtziu Paulis, sa parròchia de Nostra Segnora de sa Pasciènscia, su Rotary club Silki de Tàtari e s’Avis de Uri.
Su programma cumpletu est in su situ www.notesenzatempo.it.
(gm)
Leave a comment