In dies de oe, pro unu pitzinnu minore, sa làcana intre sa navigatzione segura e s’atzessu a contenutos pornogràficos est fine meda. Su sistema de verìfica est fràgile a beru, ca est bastante unu click pro chi su piseddu utente nàrgiat chi tenet 18 annos. E, pro custu, est intervenende sa Cummissione Europea.
Giai s’annu coladu Bruxelles aiat abertu protzedimentos formales contra a sos colossos de s’indùstria de sa pornografia ca, sende chi sunt Very Large Online Platforms, devent rispetare su Digital Services Act. Mancari su Dsa non previdat un’òbligu universale in contu de atzertamentu de edade, a sos gigantes de su web cun prus de 45 milliones de utentes in s’Ue lis pedit istrategias reales pro eliminare sas minetzas sistèmicas a sa seguridade de sos minores.
Est gasi chi, pro nche brincare custu lìmite, s’Europa est pensende de impònnere su Age Verification Blueprint (https://ageverification.dev/) cun unu modellu operativu lestru e de fàtzile impreu. Su sistema previdet de iscarrigare un’aplicatzione mòbile chi traballat comente unu portafòlliu de identidade: s’utente efètuat una verìfica ùnica de s’edade sua carrighende unu documentu ufitziale de identidade o isfrutende sistemas de identificatzione natzionales.
A pustis de àere validadu su profilu, su wallet permitit de atestare deretu s’edade in cada situ aderente, eliminende sa netzessidade de cunsignare cada borta documentos pròpios o datos sensìbiles a sos gestores de sas prataformas: su situ retzit petzi una cunfirma critogràfica de sa majore edade sena connòschere s’identidade reale de s’impitadore. Est craru, però, chi si unu minore impreat unu dispositivu de unu mannu de domo sua, cun aprovu in antis o cun sessiones abertas, su wallet a pagu serbit. Sa verìfica de s’edade podet èssere barigada su matessi.
Gianfranca Orunesu
_________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment