A bi diat pòdere essire unu tzircùitu elètricu dae un’agigu de tinta de pennarellu ruju? Emmo. B’est resèssidu unu grupu de chirca coordinadu dae Francesco Greco, professore assotziadu de Bioingegneria in s’Iscola superiore Sant’Anna de Pisa. Pro bi lòmpere b’est chèrfidu finas unu raju laser chi, colende·bi subra, trasformat sa tinta in una forma de carbòniu porosu e condutivu, unu grafene induidu chi in inglesu li narant Laser induced graphene (Lig). «Finas a como – narat Greco – creìamus chi fiat possìbile a otènnere custu Lig petzi dae unos cantos materiales plàsticos e polìmeros particulares. Una tinta o una vernitze, imbetzes, ant sa caraterìstica de pòdere èssere impreados cun fatzilidade e in totue, comente cobertura de àteros ogetos».
Su segretu nch’est in intro de s’Eosina, su colorante presente in sos pennarellors rujos chi impreamus pro iscrìere in sas lavagnas biancas. S’istrutura chìmica sua est simigiante meda a sa de su grafene e tenet fintzas una grandu istabilidade a sa temperatura. De sas caraterìsticas de s’Eosina si nde fiat giai abbigiadu, belle a fortuninu, su post-dotoradu Alexander Dallinger de s’Universidade austrìaca de Graz: «Fia proende – at naradu – s’iscritura laser in àteros materiales, ma sena resèssida. Perunu si furriaiat in grafene condutivu. In unu campione aia iscritu su nùmene suo a pennarellu ruju pro lu reconnòschere e pro casu su laser b’est coladu subra. Est tando chi mi so sapidu de una lìnia niedda chi inditaiat sa trasformatzione in grafene».
Ma comente est chi bi podet essire unu tzircùitu de una colada de colore? Cun sa metodologia Paint and Scribe: pro prima cosa su grupu de chirca at definidu su disegnu de su tzircùitu matessi in unu computer; fatu-fatu at coladu su colore in una superfìtzie. In fines, una màchina laser at sestadu in sa superfìtzie colorada su disegnu fatu cun su computer.
Gianfranca Orunesu
(Immàgine dae su canale YouTube de Scuola Sant’Anna)
Leave a comment