Si b’at chie pensat chi non bastaiant sos social network chi b’amus, luego at a pòdere èssere acuntentadu. Sa nova est chi custa faina noa la sunt aprontende sos de OpenAI, sa sotziedade nòdida chi at inventadu su chatbot ChatGPT e chi si la cheriat comporare su mere de X. Sa cosa nde l’ant bogada a pìgiu sos de sa rivista The Verge pregontende·si: «Est prontu Sam Altman a incruèschere sa rialia sua cun Elon Musk e Mark Zuckerberg?».
Cheret chi nos ammentemus sa risposta de Altman cando chi su compare de Trump si cheriat comporare s’azienda sua cun 97,4 milliardos de dòllaros: «Nono, gràtzias, ma si cheres ti comporamus nois Twitter cun 9,74 milliardos». No ischimus però comente at a èssere custu social nou. Sos de Verge nos contant chi, emmo, sa prataforma chi sunt iscumproende est ligada a s’istrumentu de generatzione de immàgines, ma est galu chitzo a lu nàrrere ca su progetu est in sas fases preliminares suas. Duncas est finamentas possìbile chi custa prataforma potzat sighire sa caminera sua in autonomia che chi esserent duos produtos distintos. E chi duncas, si gasi andarent sas cosas, non si nch’at a istesiare meda dae su modellu nòdidu ex Twitter.
Ma a ite diat servire custa faina noa? Dae sa mirada de sos meres suos sa cosa est ùtile pro diferentziare sos produtos, ma finamentas pro fàghere a manera chi sos datos insertados potzant èssere de agiudu a s’annestru de s’intelligèntzia artifitziale propietària. Tocat de isetare sos isvilupos. Sas ùrtimas noas de custu mundu nos narant de comente sos chatbot sunt semper prus integrados cun sas retes sotziales: est dae pagu chi amus dadu a ischire de Meta AI presente in Facebook e in Whatsapp; e finamentas de comente Mark Zuckerberg at annuntziadu s’annestru de s’AI sua fintzas cun sos datos carrigados dae sos utentes de sos paisos europeos. A bìdere istemus.
Gianfranca Orunesu
Leave a comment