No et sa prima borta chi unu monarca istràngiu faeddet, acollidu cun totu sos onores, in su parlamentu italianu cunvocadu cun sa fòrmula pomposa de sa setziada comune. Est sutzessu cun Ioannes Paulus PP II de s’istadu pontifìtziu; est sutzessu cun sa maestade sua ispagnola Felipe Juan Pablo Alfonso de Todos los Santos de Borbón y Grecia. Como est tocadu a su re de su Rennu unidu de Grandu Britànnia e de Irlanda de su nord (e de sos àteros reames de su Commonwealth). Càralu su de tres at faeddadu in sa Càmera chi a concruos de s’època monàrchica sabàuda, daeu su 1939 a su 1943, fiat sa de sos fàscios e de sas corporatziones. E at faeddadu a dae in antis de senadores e de deputados, elègidos sos unos e sos àteros cando chi in su Rennu suo b’at galu una càmera chi eletiva no lu est. Unu paradossu. Duos. Ca su segundu est in sas paràulas de su re dende ondras a una Resistèntzia chi is guvernantes itàlicos atuales galu non bàjulant. De onni manera, in sa terra de Arbione b’at chie cheret girare pàgina e colare a sa Repùblica gasi comente acontesseit in Itàlia carchi annu in mancu de otanta a como. «S’abolitzione de sa monarchia no est cosa complicada. B’at a chèrrere un’agigu de traballu, seguru, ma su caminu est bene sestadu e sa punna meresset sa pelea pro bi lòmpere. Su parlamentu podet abolire sa monarchia dae una die a s’àtera, si est cosa chi disìgiat. Naturale, no est cosa chi ant a fàghere medas chistiones. Ma non b’at impèigu costitutzionale perunu pro custa abolitzione». Lu narant is militantes de Republic, chi annanghent: «Totu custu a pustis de unu referendum. Una borta aprovada sa lege dae su parlamentu, sos eletores diant torrare a sas urnas pro seberare su cabu de Istadu nou. Fatu su giuramentu de custu, su betzu – su monarca – si nch’andat giubiladu». E como is de Republic sunt aprontende duas dies de eventos: su Republic day de su 10 de maju in Trafalgar square e sa Trooping protest de su 14 de làmpadas in tretos de Buckingam Palace.
mauro piredda
Leave a comment