Eris su Casteddu at istratzadu unu parègiu in domo de s’Atalanta. S’iscuadra de Bèrgamu at proadu totu sa partida a bìnchere, ma essende istraca dae su disafiu in Champions League contra a su Bruges, no teniat s’atza de sas dies coladas. In prus sos rujos biaitos ant ammustradu una defensa bene ammanigiada, chi sena bisòngiu de si tancare de su totu, at istudadu cale si siat atacu de sos lombardos. Unu rolu de importu mannu l’at àpidu su portieri de sos sardos, Caprile, chi a s’agabbu de su match a leadu duos botzas perigulosos meda.
Si est beru chi eris sos atacantes no ant conchistadu bòcias chi podiant de a beru èssere mudada in retzas, francu una, b’at de nàrrere chi non fiat fàtzile: s’Atalanta est fatende unu campionadu lutende pro sa chima, andende a dae in antis in sa Champions e boghende belle semper unu fùbalu de calidade.
Dae s’ala sua su Casteddu paret in un’annu mègius a cunfrontu cun s’annu coladu. Su parègiu de eris, difatis, no est s’ùnicu conchistadu contra a iscuadras de importu. A santugaine in Torinu, contra a sa Juventus, at peleadu cun orgògliu e a batidu a domo unu puntu de oro. Unu mese a pustis, in una partida cun ses retzas su Casteddu a firmadu su Milan, e l’at torradu a firmare a bennàrgiu cun unu goal pro cada iscuadra.
Custas dies bonas, però, andant in paris cun àteras in ue su Casteddu est pàrfidu pagu atentu e malassortadu. Mescamente cun sas aversàrias de sa cursa a sarvesa, at pèrdidu puntos de importu mannu. Cun su Lece no est rennèssidu nen a bìnchere e nen a paregiare mancari unu tempus in superioridade numèrica; cun s’Èmpoli sas faddinas in defensa e in atacu ant cundennadu sos sardos a unu resurtu malu e sa matessi andanta los at fatu pèrdere cun suVenètzia.
S’otimismu però est creschende, ca sas còmporas de s’ierru ant donadu un’echilìbriu a sos repartos chi mancaiat e una mente frita chi podet èssere de fundamentu pro tentare sa gianna e conchistare puntos de importu, comente a eris.
Gabriele Tanda
Leave a comment