Su 13 de nadale in Washington su Dipartimentu de s’Energia at decraradu chi chircadores ant cumpridu unu passu de importu pro sa fusione nucleare. Sa tecnologia est cussa chi acontesset intro de su sole e non faghet arga perigulosa comente cussa de sa fissione impitada in sas tzentrales nucleares chi bi sunt oe.
Sa fissione, su protzessu chi acontesset intro de sas tzentrales atòmicas impitadas como, est sa segada de unu nùcleu atòmicu mannu cun partitzellas prus minores. Su protzessu andat compidadu cun aficu, ca s’arriscu est chi sa reatzione a cadena potzat fuire e fàghere dannu mannu, comente est capitadu in Cernobyl. In prus s’arga chi nd’essit est radiativa e est difìtzile a l’ammanigiare.
Sa fusione, a su revessu, est s’unione de duos nùcleos atòmicos minores in unu prus mannu, acontèssida chi produit energia. Su problema est chi pro renèssere a fàghere una cosa gasi b’at bisòngiu de una cantidade manna de energia, ca sos nùcleos de sos àtomos si rebusant unu cun s’àteru comente a duas calamitas de su matessi sinnu. Non b’at arriscu perunu de un’iscòpiu, tando, ca cada fusione est cherrida. Fintzas a oe s’energia in sa reatzione, e in cussa ebbia, fiat de mancu de sa chi serbiat pro la fàghere, oe cussu lìmite s’est barigadu. Su problema chi abarrat est chi in su totale de su protzessu s’energia gastada est galu tropu, cun tempos tropu longos. Pro èssere de balàngiu b’at bisòngiu de nessi chentu bortas s’energia produida como. Est a nàrrere chi de caminu bi nd’at de fàghere maicantu, fintzas si su passu est de importu mannu.
(redatzione)
Leave a comment