Su progetu si narat “Mar-Miniera Argentiera”. S’idea est a pònnere in pare arte, archeologia industriale, recùperu de su territòriu e bellesa ambientale. L’at amaniadu s’assòtziu culturale “LandWorks” pro s’ex bidda minerària mesu abbandonada, fratzione de Tàtari, chi s’agatat a 43 chilòmetros dae Tàtari e 34 dae S’Alighera. Su progetu est intradu in sos primos 5 binchidores de su bandu 2023 de “Fondazione Italia Patria della Bellezza”, binchende unu prèmiu de 20.000,00 èuros.
S’Argentiera est unu de sos giassos de archeologia industriale prus mannos in Sardigna. Est una bidda pantàsima chi si incrarat in unu mare lìmpiu e incantadore, in ue sos fràigos mesu derrutos chi unu tempus impreaiant sos minadores pro su traballu issoro s’alternant a domos torradas a nou. Inoghe unas cantas istruturas industriales, comente sa laveria, las at restruturadas s’amministratzione comunale.
LandWorks at pensadu de furare ispàtzios a su degradu, faghende unu museu abertu in ue unos cantos artistas ant lassadu su sinnu, faghende nàschere una casta de turismu culturale. Unu progetu chi, cun s’atzione coordinada de operadores medas, promovet formas noas de impreu de su territòriu e isperimentat modalidades noas de produtzione artìstica in unu clima multidisciplinare.
(sa redatzione)
Leave a comment
Ite bella pensada! Unu motivu in prus pro vi torrare!