Gianfranco Incollu un’operaju de Forestas de 55 annos de Baunei est mortu eris cando est ghiradu a domo a pustis de unu merie intreu cumbatende contra a su fogu chi at fatu a chinisu sos sartos de Jersu. Sa calura e su traballu l’ant debilitadu gasi meda chi s’est intesu male e, fintzas si sos sucursos sunt lòmpidos deretos, in pagu tempus at lassadu sa vida.
Francu su fogu in Ogiastra, eris est istada una die de fogos in logos medas de Sardigna. In sa zona de Terranoa unas cantas famìllias ant dèpidu mòere a sa lestra ca sas framas fiant a curtzu a sas domos issoro. Sa matessi situatzione fiat acontessende fintzas in Deximeputzu, in ue su fogu si fiat acurtziende a sa bidda. In su tretu de sa 131 serente a Santa Giusta sas veturas non ant pòdidu colare pro carchi oras pro neghe de sas framas chi aiant leadu s’istrada dae un’ala a s’àtera. Fintzas su trenu pro Casteddu s’est dèpidu arressare pro sa matessi resone in chìrrios de Seddori.
(redatzione)
Leave a comment